«Յունիբանկի» Աշտարակի մասնաճյուղում պայթյուն է եղել. նախնական տվյալներով՝ կա 1 զոհ և 5 տուժած
Հուլիսի 6-ին՝ ժամը 9:07-ին, Արագածոտնի մարզային ճգնաժամային կառավարման կենտրոն ահազանգ է ստացվել, որ Աշտարակ քաղաքի բանկերից մեկում տեղի է ունեցել պայթյուն՝ հրդեհի բռնկմամբ: Այս մասին հաղորդում է արտակարգ իրավիճակների նախարարությունը։
Դեպքի վայր է մեկնել մարզային փրկարարական վարչության հրշեջ-փրկարարական ջոկատից երկու մարտական հաշվարկ։
Ըստ նախնական տվյալների՝ կա մեկ զոհ և հինգ տուժած: Տուժածները հոսպիտալացվել են Աշտարակ քաղաքի բժշկական կենտրոն:
Հրդեհը մեկուսացվել է ժամը 09:25-ին, մարվել՝ 09:54-ին: Նախասրահում այրվել են կենցաղային իրեր՝ 3 քմ:
***
ԱԻՆ-ի հրապարակած լուսանկարներից մեկում երևում է «Յունիբանկի» վճարային տերմինալը, ուստի կարելի է ենթադրել, որ պայթյունը եղել է հենց «Յունիբանկի» մասնաճյուղում։
Լրացում, 11։15
«Յունիբանկը» հայտնում է, որ պայթունի հետևանքով մահացել է մասնաճյուղում մաքրման ծառայություն իրականացնող ընկերության աշխատակից Ռուզաննա Խաչատրյանը:
«Մեր խորին ցավակցությունն ենք հայտնում Ռուզաննա Խաչատրյանի ընտանիքին և հարազատներին և կիսում նրանց մեծ վիշտը:
Մասնաճյուղի այլ աշխատակիցներ տեղափոխվել են հիվանդանոց:
Փորձագետների եզրակացությունից հետո ավելի մանրամասն կներկայացնենք տարածքում տեղի ունեցած պայթյունի հանգամանքները»,- ասվում է «Յունիբանկի» հաղորդագրությունում։
Մեկնաբանել