Վրաստանը չի մասնակցի «3+3» ձևաչափով Թուրքիայում կայանալիք հանդիպմանը։ Այս մասին թուրքական Daily Sabah-ի փոխանցմամբ հայտարարել է Թուրքիայում Վրաստանի դեսպան Գեորգի Ջանջգավան։ 

Ըստ թուրքական լրատվամիջոցի՝ Վրաստանի դեսպանը նշել է, որ այդ երկիրը Թուրքիային ու Ադրբեջանին դիտարկում է որպես ռազմավարական գործընկերներ, իսկ Հայաստանին որպես պատմական հարևան։ 

Ջանջգավան ընդգծել է, որ Ռուսաստանը, որը «3+3» ձևաչափի մասնակիցներից մեկն է, «բռնազավթել է Վրաստանի տարածքի 20 %-ը»։ 

Հիշեցնենք, որ ավելի վաղ Թուրքիայի արտաքին գործերի նախարար Մևլյութ Չավուշօղլուն հայտարարել էր, որ սպասվում է, որ Հարավային Կովկասում համագործակցության «3+3» ձևաչափով հարթակի հաջորդ հանդիպմանը կմասնակցի նաև Վրաստանը։ «Մենք հանդիպում ենք ունեցել Մոսկվայում, բայց Վրաստանը չի մասնակցել դրան։ Սակայն հաջորդ հանդիպումը կկայանա Անկարայում, և մենք սպասում ենք դրան Վրաստանի մասնակցությունը»,- նշել էր Չավուշօղլուն։ 

Այս ձևաչափով առաջին հանդիպումը կայացել է 2021 թվականի դեկտեմբերի 10-ին, Մոսկվայում։ Հայաստանը ներկայացնում էր ԱԳ նախարարի տեղակալ Վահե Գևորգյանը։ 

«3+3» ձևաչափի ստեղծման մտադրության մասին ավելի վաղ հայտարարել էին Թուրքիայի նախագահ Ռեջեփ Թայիփ Էրդողանը և Ադրբեջանի նախագահ Իլհամ Ալիևը:

Նախատեսվում էր, որ ձևաչափի ստեղծման պարագայում դրան կանդամակցեն Հայաստանը, Ադրբեջանը, Վրաստանը, Թուրքիան, Իրանը և Ռուսաստանը։ Այն զբաղվելու է Հարավային Կովկասում հաղորդակցային և տնտեսական կապերի ապաշրջափակմամբ։

Իրանը ողջունել էր նախաձեռնությունը՝ նշելով, որ պատրաստ է քայլեր ձեռնարկել տարածաշրջանում խաղաղության ամրապնդման գործում։ Ռուսաստանի ԱԳ նախարար Սերգեյ Լավրովը ևս նշել էր նախաձեռնությամբ Ռուսաստանի հետաքրքրվածության մասին՝ հայտարարելով, որ աշխատում են հայկական կողմի հետ։

Պաշտոնական Թբիլիսին էլ հայտարարել էր, որ Վրաստանը որևէ ձևաչափով հետաքրքրված չէ մասնակցել «3+3» ձևաչափին՝ որպես պատճառ նշելով Ռուսաստանի մասնակցությունը։

Լուսանկարը՝ Daily Sabah-ի