Ռուսաստանի արտաքին գործերի նախարար Սերգեյ Լավրովը չորեքշաբթի՝ փետրվարի 17-ին, հեռախոսազրույց է ունեցել Ադրբեջանի արտաքին գործերի նախարար Ջեյհուն Բայրամովի հետ, որի ընթացքում քննարկվել է 2021 թվականի հունվարի 11-ին Արցախի վերաբերյալ Ռուսաստանի, Ադրբեջանի և Հայաստանի առաջնորդների պայմանավորվածությունների իրականացումը։

«Արտաքին քաղաքական գերատեսչությունների ղեկավարները քննարկել են 2021 թվականին Մոսկվայում Ռուսաստանի, Ադրբեջանի և Հայաստանի առաջնորդների պայմանավորվածությունների իրականացումը, ինչպես նաև երկկողմ և միջազգային օրակարգի մի շարք արդիական հարցեր»,- նշվում է ՌԴ ԱԳն տարածած հաղորդագրության մեջ։

Սերգեյ Լավրովն այսօր հանդիպելու է նաև ՀՀ արտաքին գործերի նախարար Արա Այվազյանին, իսկ մինչ այդ կայացել էր նաև Փաշինյան-Պուտին հեռախոսազրույց։

Հիշեցնենք, որ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քելբաջարի, Աղդամի և Լաչինի շրջանները։

Լեռնային Ղարաբաղում շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորախումբը:

Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ ընդ որում շրջանցելով Շուշի քաղաքը, մնաց Ռուսաստանի խաղաղապահ զորակազմի վերահսկողության ներքո:

2021 թվականի հունվարի 11-ին Հայաստանի, Ռուսաստանի և Ադրբեջանի առաջնորդները պայմանավորվել էին փոխվարչապետերի մակարդակով ստեղծել աշխատանքային խումբ, որը պետք է զբաղվի տարածաշրջանում տրանսպորտային և տնտեսական կապերի ապաշրջափակմամբ։

Կոլաժը՝ ՌԴ արտաքին գործերի նախարարության