Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասը Բելառուսի նախագահ Ալեքսանդր Լուկաշենկոյի հետ հանդիպման ժամանակ հայտնել է, որ Լեռնային Ղարաբաղում խաղաղապահների տեղակայման հարցն ակտիվորեն քննարկվում է ՀԱՊԿ-ում։ Այդ մասին գրում է «Спутник» գործակալության բելառուսական ծառայությունը։

«Ակտիվորեն քննարկվում է այդ տարածաշրջանում խաղաղապահների տեղակայման թեման»,- նշել է ՀԱՊԿ գլխավոր քարտուղարը։

Ստանիսլավ Զասը և Ալեքսանդր Լուկաշենկոն քննարկել են նաև ՀԱՊԿ տարածաշրջանում ստեղծված իրավիճակը, մասնավորապես Լեռնային Ղարաբաղում, Ղրղզստանում և Բելառուսում ընթացող գործողությունները։

Ավելի վաղ, ՀԱՊԿ գլխավոր քարտուղար Ստանիսլավ Զասը հայտարարել էր, որ Հավաքական անվտանգության պայմանագրի կազմակերպությունը արձանագրել է Սիրիայից Լեռնային Ղարաբաղի հակամարտության գոտի զինյալների տեղափոխում, սակայն դեռևս դժվար է գնահատել այդ գործընթացի մասշտաբները։

«Հիմա ինձ համար դժվար է դատել դեպի ղարաբաղյան հակամարտության գոտի զինյալների տեղափոխման մասշտաբների և կազմակերպման մասին: Ամենայն հավանականությամբ, այն կա, այնտեղ զինյալներ, վարձկաններ են հայտնվում: Իհարկե, դա չի նպաստում հարաբերությունների կարգավորմանը: Դա որոշակի մարտահրավեր է ներկայացնում կազմակերպության համար»,- Զասի խոսքերը մեջբերել էր «TACC»-ը։

Հիշեցնենք, որ ՀԱՊԿ-ին անդամակցում են Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը:

Լուսանկարը՝ digital.report-ից