Ռուսաստանի Դաշնության պաշտպանության նախարար Սերգեյ Շոյգուն Հայաստանի պաշտպանության նախարար Դավիթ Տոնոյանին և Ադրբեջանի պաշտպանության նախարար Զաքիր Հասանովին կոչ է արել պահպանել Լեռնային Ղարաբաղի հակամարտության մոսկովյան համաձայնագրով ստանձնած պարտավորությունները։ Այդ մասին հայտարարել է Ռուսաստանի ռազմական գլխավոր գերատեսչությունը։

ՌԴ պաշտպանության նախարարության փոխանցմամբ՝ Շոյգուն հեռախոսային բանակցություններ է վարել երկու երկրների պաշտպանության նախարարների հետ։

«Բանակցւթյունների ընթացքում Ռուսաստանի Դաշնության պաշտպանության նախարար, բանակի գեներալ Սերգեյ Շոյգուն Ադրբեջանի և Հայաստանի իր գործընկերներին կոչ է արել ամբողջությամբ հավատարիմ մնալ հոկտեմբերի 10-ին Մոսկվայում ձեռքբերված պայմանավորվածություններին»,- հայտարարել է նախարարության մամուլի ծառայությունը։

Հիշեցնենք, որ հոկտեմբերի 9-ին Մոսկվայում Հայաստանի, Ադրբեջանի և Ռուսաստանի արտաքին գործերի նախարարների 11 ժամ տևած բանակցությունների ընթացքում կողմերը որոշել էին հոկտեմբերի 10-ից հայտարարել հումանիտար հրադադար, որը, սակայն, չի պահպանվել։

Լուսանկարը՝ TACC գործակալության