Այսօր Ազգային ժողովի ընդմիջման ժամին ԱԺ նախագահ Հովիկ Աբրահամյանը պատասխանելով լրագրողների հարցերին անդրադարձավ նաեւ WikiLeaks-ի գաղտնազերծված փաստաթղթերին, որոնք վերաբերում են հայաստանյան պաշտոնյաներին:

«WikiLeaks-ի բոլոր բացահայտումներից ելնելով, ուզում եմ որոշ քաղաքական գործիչների խորհուրդ տալ, որ միշտ խոսում են պատերի տակ, ժողովրդի հետ կամ այլ քաղաքացու հետ, թող միշտ հիշեն, որ կարող է օրը գա իրենց խոսակցությունները, մտքերը ի հայտ գան եւ հանրության համար հասանելի լինի: Դրա համար հորդորում եմ, որ բոլորը իրենց խոսքերում, մոտեցումներում լինեն չափավոր»,-ասաց ԱԺ նախագահը:

Ինչ վերաբերում է WikiLeaks-ի այն հրապարակմանը, թե Հայաստանում ԱՄՆ փոխդեսպանի հետ հանդիպման ժամանակ ԱԺ նախագահն ասել է, թե վարչապետը միայն խոսում է եւ չի գործում, Հովիկ Աբրահամյանն ասաց, թե իր մասին ընդամենը մեկ հրապարակում է եղել եւ ինքը հերքել է, թե փոխդեսպանի հետ հանդիպում է ունեցել: «Ես փոխդեսպանի հետ որեւէ հանդիպում չեմ ունեցել, ուրեմն չէր էլ կարող որեւէ խոսակցություն լինել»,-ասաց Հ. Ա.բրահամյանը: