Մոտ մեկ ժամվա ընթացքում գործարար Սամվել Կարապետյանին կալանավորելու միջնորդությունը կմուտքագրվի դատարան։ Այս մասին «Հետքին» հայտնում են մեր աղբյուրները։ Այսօր մոտ երեք տասնյակ անձանց մեղադրանք է առաջադրվել, իսկ Սամվել Կարապետյանը ձերբակալվել է։

Հիշեցնենք՝ Քննչական կոմիտեն հանրային քրեական հետապնդում է հարուցել 36 անձի նկատմամբ՝ «Հայաստանի էլեկտրական ցանցեր» ՓԲԸ-ին 64.5 մլրդ դրամի վնաս պատճառելու դեպքի առթիվ քննվող քրեական վարույթի շրջանակում։ «Հետքի» տեղեկություններով՝ հետապնդման ենթարկվողների թվում է նաև ընկերության սեփականատեր Սամվել Կարապետյանը։

Քննչական կոմիտեի հաղորդմամբ՝ 2016-2024 թվականներին, Ս.Կ.-ի կազմակերպմամբ, ՀԷՑ-ի մի շարք պատասխանատու անձինք չարաշահել են իրենց լիազորությունները, հափշտակել ընկերության գույքը և կատարել փողերի լվացում։ Ըստ քննության՝ ընկերության բնականոն գործունեության անհրաժեշտությունից չբխող վարկային միջոցներ են ներգրավվել, ապա գումարներ են տրամադրվել որպես շահաբաժիններ, փոխառություններ և կանխավճարներ։

Քննչական կոմիտեի տվյալներով՝ ընկերությունից ապօրինի դուրս է բերվել ընդհանուր 23.1 մլրդ դրամ, իսկ ենթադրյալ գործողությունների հետևանքով ՀԷՑ-ին պատճառված ընդհանուր վնասը կազմել է 64 մլրդ 585 մլն դրամ։

Նախաքննության շրջանակում այսօր միաժամանակյա խուզարկություններ են իրականացվում 65 բնակարաններում և ընկերությունների գործունեության հասցեներում։ Քննիչը որոշում է կայացրել նաև 36 անձանց ձերբակալելու վերաբերյալ։

Հանրային քրեական հետապնդումը հարուցվել է մասնավոր ոլորտում ծառայողական լիազորությունների չարաշահման, վստահված գույքը առանձնապես խոշոր չափերով հափշտակելու և փողերի լվացման հոդվածներով։

Քրեական վարույթի նախաքննությունը շարունակվում է։ Նշված անձանց մեղավորությունը հաստատված չէ, քանի դեռ այն չի հաստատվել դատարանի՝ օրինական ուժի մեջ մտած դատավճռով։