Տարածաշրջանային համագործակցության «3+3» հարթակի շրջանակում արտաքին գործերի նախարարների հաջորդ հանդիպումը Երևանում կամ Բաքվում անցկացնելու հարցը ներկայումս քննարկման և համաձայնեցման փուլում է։ Այդ մասին նշվում է ՌԴ արտաքին գործերի նախարարության հաղորդագրության մեջ։

Հոկտեմբերի 16-ին «Ռուսական էներգետիկ շաբաթ» միջազգային համաժողովի շրջանակում անցկացվել է «3+3 հարթակ. էներգետիկ համագործակցությունը՝ որպես Հարավային Կովկասում խաղաղության և անվտանգության հենասյուն» խորագրով քննարկում։ Միջոցառման նպատակն էր զարգացնել «3+3» ձևաչափում ընդգրկված երկրների՝ Հայաստանի, Ադրբեջանի, Վրաստանի, Ռուսաստանի, Իրանի և Թուրքիայի միջև էներգետիկ ոլորտի համագործակցությունն ու փոխադարձ հետաքրքրություն ներկայացնող հարցերի շուրջ երկխոսությունը։

Ռուսաստանի ԱԳՆ-ն հիշեցրել է, որ «3+3» ձևաչափով առաջին հանդիպումը կայացել էր 2021 թվականի դեկտեմբերին՝ Մոսկվայում։ Դրան հաջորդել էին հանդիպումները Թեհրանում՝ 2023 թվականին, և Ստամբուլում՝ 2024 թվականին։

2026 թվականին կայացած Սանկտ Պետերբուրգի 29-րդ միջազգային տնտեսական համաժողովի շրջանակում մեկնարկել է նաև հարթակի վեց երկրների փորձագիտական երկխոսությունը։

«Ներկայումս համաձայնեցվում է արտաքին գործերի նախարարների հաջորդ հանդիպումն Բաքվում կամ Երևանում անցկացնելու հարցը»,- նշել են Ռուսաստանի արտաքին քաղաքական գերատեսչությունում։

Պաշտոնական Թբիլիսին հայտարարել է, որ Վրաստանը որևէ կերպ հետաքրքրված չէ մասնակցել «3+3» ձևաչափին՝ որպես պատճառ նշելով Ռուսաստանի մասնակցությունը։

Լուսանկարը՝ ՀՀ ԱԳՆ մամուլի ծառայության