Իրանի ԱԳՆ պաշտոնական ներկայացուցիչ Էսմայիլ Բաղային հայտարարել է, որ Թեհրանը չի պահանջել վերսկսել բանակցությունները Վաշինգտոնի հետ։ Նրա խոսքով՝ այժմ բանակցություններ չեն ընթանում, սակայն միջնորդների միջոցով հաղորդագրությունների փոխանակումը դեռ հնարավոր է:

«Միջնորդները կարող են տարածաշրջանում ընթացիկ իրադարձությունների մասին մեզ ամերիկյան կողմից հաղորդագրություններ փոխանցել, սակայն ներկայումս մենք ամերիկյան կողմի հետ ոչ մի բանակցություն չունենք»,- լրագրողների հետ ճեպազրույցի ժամանակ հայտարարել է նա։ Բաղայիի խոսքով՝ հերթական սրումից ի վեր Իրանը չի պահանջել որևէ բանակցության անցկացում։ 

«Իրանի կողմից բանակցությունների խնդրանքը նորություն է, որն ընդդիմախոսները ժամանակ առ ժամանակ հրապարակում են»,- հավելել է Իրանի արտաքին քաղաքական գերատեսչության պաշտոնական ներկայացուցիչը։

ԱՄՆ-ի և Իրանի միջև հակամարտության հերթական էսկալացիան սկսվել էր հուլիսի 8-ին։ ԱՄՆ Զինված ուժերը Վաշինգտոնի և Թեհրանի միջև հուշագրի ստորագրումից ի վեր առաջին անգամ մի քանի հարվածներ էին հասցրել Իսլամական Հանրապետության տարածքին՝ ի պատասխան Հորմուզի նեղուցում առևտրային նավի վրա իրանական կողմի հարձակման: 

Նույն օրն ԱՄՆ նախագահ Դոնալդ Թրամփը հայտարարեց Իրանի հետ հրադադարի ռեժիմի դադարեցման մասին: Պատասխան գործողությունների շրջանակներում Թեհրանը սկսել էր հարվածներ հասցնել Մերձավոր Արևելքում ամերիկյան օբյեկտներին, որոնք գտնվում են Բահրեյնում, Հորդանանում, Կատարում, Քուվեյթում, Արաբական Միացյալ Էմիրություններում և Օմանում: Հուլիսի 24-ին կողմերը դադարեցրել էին փոխադարձ հարվածները։

Լուսանկարում՝ Էսմայիլ Բաղային/Majid Asgaripour/WANA (West Asia News Agency) via Reuters