ՀՀ վարչապետ Նիկոլ Փաշինյանի՝ Հայաստանում երկաթուղային ենթակառուցվածքների կառավարման ՌԴ-ի կոնցեսիան վաճառելու առաջարկը տարօրինակ է։ Նման հայտարարությամբ այսօր հանդես է եկել ՌԴ ԱԳՆ պաշտոնական ներկայացուցիչ Մարիա Զախարովան։ Նրա խոսքով՝ Մոսկվան հանդես է գալիս տարածաշրջանային հաղորդակցությունների ապաշրջափակման օգտին։

«Գիտեք, շատ տարօրինակ հայտարարություններ են: Ռուսաստանը հետևողականորեն հանդես է գալիս տարածաշրջանային տրանսպորտային և տնտեսական բոլոր հաղորդակցությունների ապաշրջափակման օգտին։ Դրա ուղղությամբ շատ բան է արվել Ռուսաստանի, Հայաստանի և Ադրբեջանի փոխվարչապետների համանախագահությամբ եռակողմ աշխատանքային խմբի շրջանակներում»,- հայտարարել է Զախարովան՝ արձագանքելով այն հարցին, թե ինչպես է ռուսական կողմը մեկնաբանում  Փաշինյանի հայտարարությունն առ այն, որ Ռուսաստանը կարող է որևէ երրորդ երկրի վաճառել հայկական երկաթուղու կառավարման կոնցեսիան։

Զախարովայի խոսքով՝ Ռուսական երկաթուղին մեծ ներդրումներ է արել հայկական երկաթուղային ենթակառուցվածքի զարգացման գործում։ «Ռուսական երկաթուղին կառուցվածք է, որը Հայաստանին չի զրկում մրցակցային հնարավորություններից, այլ ստեղծում է այն։ Սակայն Երևանում, կարծես թե, մոռացել են այդ մասին»,- հավելել է նա։

Հիշեցնենք, որ 2008 թվականին Հայաստանն իր երկաթուղային ենթակառուցվածքները փոխանցեց Ռուսական երկաթուղու (РЖД) դուստր ընկերության Հարավկովկասյան երկաթուղու կոնցեսիոն կառավարմանը։ Պայմանագրով կառավարումը փոխանցվել է 30 տարի ժամկետով՝ ևս 10 տարով երկարաձգման հնարավորությամբ։

Լուսանկարը՝ Sputnik գործակալության