Այսօր՝ հունվարի 13-ին, հրավիրած մամուլի ասուլիսի ընթացքում «Հայ հեղափոխական դաշնակցություն» կուսակցության անդամ, ԱԺ «Հայաստան» խմբակցության պատգամավոր Իշխան Սաղաթելյանը հայտարարեց, որ կուսակցության գերագույն ժողովում որոշում է կայացվել մասնակցել 2026-ի խորհրդարանական ընտրություններին։

Սաղաթելյանը նշեց, որ որոշում է կայացվել ընտրություններին մասնացել դաշինքային ձևաչափով և ՀՅԴ Գերագույն մարմինը սկսելու է ակտիվ բանակցություններ վարել քաղաքական ուժերի հետ։

Թե որ ուժերի հետ են պատրաստվում բանակցություներ սկսել, Սաղաթելյանը չմանրամասնեց, բայց նշեց, որ նպատակ ունեն պահպանել արդեն իսկ առկա դաշինքը և այն ընդլայնել՝ ներգրավելով այլ ուժերի։

«Սա սովորական, հերթական կամ ընթացիկ ընտրություն չէ մեզ համար։ Այս ընտրությունների արդյունքով է որոշվելու հայ ժողովրդի և մեր պետության ճակատագիրը։ Մենք այս ընտրությունները դիտում ենք իբրև հնարավորություն՝ այս իշխանության վերարտադրությունը կանխելու համար»,- ասաց Սաղաթելյանը։

Իշխան Սաղաթելյանը նաև հավելեց, որ իշխանություններին հեռացնելու համար պատրաստ են համագործակցել ընդդիմադիր դաշտի բոլոր ուժերի հետ։

Հիշեցենք, որ նախորդ՝ 2021 թվականի խորհրդարանական ընտրություններին ՀՅԴ-ն մասնակցել էր «Հայաստան» դաշինքի կազմում, որը գլխավորում էր ՀՀ երկրորդ նախագահ Ռոբերտ Քոչարյանը։ Դաշինքի կազմում էր նաև «Վերածնվող Հայաստան» կուսակցությունը։