ԱՄՆ իշխանությունները «Վենեսուելայի դեմ զինված ագրեսիայի գործողություն են իրականացրել»՝ գերեվարելով այդ երկրի նախագահ Նիկոլաս Մադուրոյին և նրա կնոջը։ Այդ մասին հայտարարություն է տարածել Ռուսաստանի արտաքին գործերի նախարարությունը։ 

«Սա առաջացնում է խորը մտահոգություն և դատապարտում։ Այդպիսի գործողությունները հիմնավորող նախադրյալներն անհիմն են: Գաղափարականացված հակակրանքը գերակշռում էր գործնական պրագմատիզմին, վստահության և կանխատեսելիության հարաբերություններ կառուցելու պատրաստակամությանը»,- ասված է ՌԴ ԱԳՆ հայտարարության մեջ։

Ռուս դիվանագետները կոչ են արել թույլ չտալ իրավիճակի հետագա սրում՝ նշելով, որ Լատինական Ամերիկան «պետք է մնա խաղաղության գոտի»:

«Հաստատում ենք մեր համերաշխությունը Վենեսուելայի ժողովրդի հետ, աջակցությունը նրա բոլիվարյան ղեկավարության կուրսին, որն ուղղված է երկրի ազգային շահերի և ինքնիշխանության պաշտպանությանը»,- հավելել է ռուսական կողմը։

Վենեսուելան Հարավային Ամերիկայում Ռուսաստանի հիմնական դաշնակիցն էր ու ավտորիտար կառավարման ձևով պետություն։ Ամերիկյան կողմը չէր ճանաչում Մադուրոյի իշխանությունը։

• Ամերիկյան հարվածներ, պայթյուններ և խուճապ Կարակասում. ինչ է կատարվում Վենեսուելայի մայրաքաղաքում
  

Հիշեցնենք, որ այսօր առավոտյան ԱՄՆ-ն լայնածավալ գործողություն էր իրականացրել Վենեսուելայի տարածքում, ինչի հետևանքով ձերբակալվել է այդ երկրի նախագահ Նիկոլաս Մադուրոն և նրա կինը, որոնք, ինչպես պնդում է ամերիկյան կողմը, տեղափոխվել են Միացյալ Նահանգներ։

ԱՄՆ պետքարտուղար Մարկո Ռուբիոն հայտարարել է, որ Մադուրոն կկանգնի ամերիկյան արդարադատության առաջ։

Լուսանկարում՝ Նիկոլաս Մադուրոն և Վլադիմիր Պուտինը/Reuters գործակալություն