Մոսկվայի հարավում, ավտոմեքենայի պայթյունի հետևանքով, զոհվել է ՌԴ զինված ուժերի գլխավոր շտաբի օպերատիվ պատրաստության վարչության պետ, գեներալ-լեյտենանտ Ֆանիլ Սարվարովը։ Այդ մասին հայտնում է ՌԴ Քննչական կոմիտեն։ Հարուցվել է քրեական գործ այդ երկրի ՔՕ 105-րդ հոդվածի 2-րդ («սպանություն, որը կատարվել է հանրության համար վտանգավոր կերպով») և 221-րդ հոդվածի 1-ին մասերով («պայթուցիկ սարքերի ապօրինի շրջանառություն»)։

Պայթյունը տեղի է ունեցել դեկտեմբերի 22-ի առավոտյան։ ՌԴ Քննչական կոմիտեից հայտնել են, որ պայթուցիկ սարքը տեղադրված է եղել մեքենայի տակ։ «Коммерсант»-ի տվյալներով՝ պայթյունի համար օգտագործվել է մագնիսային ական։ Դիտարկվում են սպանության տարբեր վարկածներ։ «Դրանցից մեկը կապված է ուկրաինական հատուկ ծառայությունների կողմից հանցագործության կազմակերպման հետ»,- ասված է հաղորդագրության մեջ։

Ռուսական ուժային կառույցներին մոտ տելեգրամյան «База» ալիքը գրել է, որ պայթյունից հետո Սարվարովը գտնվել է ծանր վիճակում։ Նրա մոտ արձանագրվել են բեկորային բազմաթիվ վնասվածքներ, ոտքերի լուրջ վնասվածքներ և դիմոսկրի կոտրվածք։ Տելեգրամյան «База» և «Shot» ալիքների տվյալներով՝ մինչև պայթյունը Սարվարովը կարողացել էր մի քանի մետր շարժվել իր Kia Sorento մեքենայով։ Լուսանկարներից ելնելով՝ պայթյունը եղել է մեքենայի սկզբնային հատվածում։

«Агентство»-ն էլ գրում է, որ պայթյունը տեղի է ունեցել այն շենքից մոտ 150 մետր հեռավորության վրա, որտեղ բնակվում են ՌԴ ԶՈւ Գլխավոր հետախուզական վարչության մի շարք աշխատակիցներ։

Ֆանիլ Սարվարովը 56 տարեկան էր։ Մասնակցել է Չեչենական պատերազմներին։ 2015-2016 թվականներին ծառայել է Սիրիայում։ ՌԴ ԶՈւ Գլխավոր շտաբի օպերատիվ պատրաստության վարչության պետի պաշտոնն զբաղեցնում էր 2016 թվականից։

Լուսանկարը՝ ՌԴ Քննչական կոմիտեի մամուլի ծառայության