2025 թվականի հունվարի 7-ին «Հայաստանի հանրային հեռուստաընկերություն» ՓԲԸ-ն հեռուստալսարանի ապահովման ծառայություններ ձեռք բերելու համար պայմանագիր է կնքել «Ինդիվիդում կաստինգ» ՍՊԸ-ի հետ։ Պայմանագրի արժեքը 12 մլն դրամ է։

Հանրային հեռուստաընկերությունն այս ծառայությունը ձեռք բերելու համար մրցույթ չի հայտարարել և ձեռք է բերել մեկ անձից գնման ընթացակարգով։

Համաձայն «Գնումների մասին» ՀՀ օրենքի 23-րդ հոդվածի 1-ին մասի 4-րդ կետի՝ գնումը կարող է կատարվել մեկ անձից, եթե գնման գինը չի գերազանցում գնումների բազային միավորը՝ 1 մլն դրամը։

Սա «Ինդիվիդում կաստինգ»-ի և «Հայաստանի հանրային հեռուստաընկերություն» ՓԲԸ-ի միջև կնքված միակ պայմանագիրը չէ։ Համաձայն պետական գնումների armeps.am հարթակի տվյալների՝ 2020-2025 թվականներին «Ինդիվիդում կաստինգ» ՍՊԸ-ի հետ կնքվել է 13 պայմանագիր՝ 12-ը «Հայաստանի հանրային հեռուստաընկերություն» ՓԲԸ-ի, 1-ը՝ վարչապետի աշխատակազմի հետ։ Պայմանագրերի ընդհանուր գումարը 80 մլն 422 հազար դրամ է։

«Ինդիվիդում կաստինգ» ՍՊԸ-ի հետ կնքված պայմանագրերից միայն չորսի գինն է մեկ մլն դրամից ցածր։ Այստեղ հարց է առաջանում՝ ինչու է «Հանրային հեռուստաընկերություն» ՓԲԸ-ն որոշել գնումն իրականացնել մեկ անձից գնման եղանակով։

«Հետքը» գրավոր հարցում ուղարկեց Հանրային հեռուստաընկերություն մեկնաբանություն ստանալու համար։ «Հայաստանի հանրային հեռուստաընկերություն» ՓԲԸ-ի ֆինանսական տնօրեն Արարատ Հակոբյանը հարցմանն ի պատասխան նշել է, որ համաձայն Կառավարության 2017 թվականի մայիսի 4-ի N 526-Ն որոշմամբ հաստատված գնումների գործընթացի կազմակերպման կարգի 23-րդ կետի 4-րդ ենթակետի աղյուսակի 33-րդ կետի հատուկ և բացառիկ իրավունքի առկայության հիմքով՝ հեռուստահաղորդումների պատրաստման ընթացքում ապրանքների, աշխատանքների և ծառայությունների ձեռքբերումը, բացառությամբ շինարարության, կարող է ձեռք բերվել մեկ անձից գնման ընթացակարգով։

Սակայն, հարց է առաջանում՝ ինչպես կարող է հատուկ կամ բացառիկ իրավունքի առկայություն լինել հեռուստալսարանի ապահովման ծառայությունների մատուցման դեպքում։

Ըստ էության, «ծափահարողների» (հանդիսատեսի) մասնակցությունն ապահովելու ծառայությունը չի ենթադրում որևէ ընկերության կամ անձի բացառիկ կամ հատուկ իրավունք:

Հեռուստալսարանի ապահովման ծառայությունը մեկ անձից ձեռք բերելու մասով մեկնաբանություն էինք խնդրել նաև Ֆինանսների նախարարությունից, քանի որ նրանք են ոլորտը համակարգող մարմինը։ Ֆիննախից մեր հարցմանն ի պատասխան նշել են, որ պատվիրատուի կողմից գնման ձևի ընտրության իրավաչափությունը գնահատելու, ինչպես նաև գնումների գործընթացների նկատմամբ վերահսկողություն իրականացնելու իրավասություններ նախարարությունը չունի։

Համաձայն պայմանագրի՝ «Ինդիվիդում կաստինգ» ՍՊԸ-ն պետք է ապահովեր հանդիսատեսի ներկայություն Հանրային հեռուստաընկերության հաղորդումներում։ Մեկ անձի 8 ժամ տևողությամբ նկարահանման մասնակցությունը ապահովելու համար Հանրայինը «Ինդիվիդում կաստինգ»-ին վճարել է 2900-ից 4500 դրամ։ Գումարի այս միջակայքը կապված է հանդիսատեսի տարիքի հետ։ Մասնավորապես 18-50 տարեկան մեկ հանդիսականի համար ընկերությանը վճարվել է 4500 դրամ, իսկ 50-ից բարձր տարիքային խմբի համար՝ 2900 դրամ։ Հատուկ կերպարների ներգրավման համար ընկերությանը վճարվել է 11.150 դրամ։

Մենք նաև գրավոր հարցում ենք ուղարկել Մարդու իրավունքների պաշտպան Անահիտ Մանասյանին՝ խնդրելով նշել, թե արդյոք խնդիր չի տեսնում տարիքով պայմանավորված նույն աշխատանքը կատարող մարդկանց տարբեր գումարներ վճարելու մեջ։ ՄԻՊ-ի գրասենյակից պատասխանել են, որ իրենք մասնավոր ընկերության վերաբերյալ բողոքներ քննելու իրավասություն չունեն և մեր հարցումը վերահասցեագրել են Առողջապահության և աշխատանքի տեսչական մարմին։ 

«Ինդիվիդում կաստինգ» ՍՊԸ-ն հիմնադրվել է 2009 թվականին։ Ընկերության սեփականատերը Երևանի ավագանու «Քաղաքացիական պայմանագիր» խմբակցության անդամ Աշոտ Սարգսյանն է։

Աշոտ Սարգսյանը ավագանու անդամ  է ընտրվել նաև 2018 թվականին, «Իմ քայլը» խմբակցության ցուցակով։ Սարգսյանը 2018 թվականի օգոստոսից «Քաղաքացիական պայմանագիր» կուսակցության անդամ է: 2019-2020 թվականներին զբաղեցրել է առողջապահության նախարար Արսեն Թորոսյանի խորհրդականի պաշտոնը, իսկ 2020-2022 թվականներին՝ Ինֆեկցիոն հիվանդությունների ազգային կենտրոնի փոխտնօրենի պաշտոնը: