Ռուսաստանի պաշտպանության նախարարությունը հայտարարել է, որ Կիևը Մոսկվային է փոխանցել ռուսաստանցի ռազմագերիների ևս մեկ խումբ: Փոխարենը ռուսական կողմը Ուկրաինային է փոխանցել այդ երկրի զինված ուժերի մի խումբ զինծառայողների, որոնք ավելի վաղ հայտնվել էին ռուսական գերությունում։

Ինչպես պնդում է ռուսական կողմը, փոխանակումը տեղի է ունեցել «հունիսի 2-ին Ստամբուլում ռուս-ուկրաինական ձեռք բերված պայմանավորվածությունների համաձայն»։

ՌԴ ՊՆ-ն չի մանրամասնել, թե քանի մարդ է մասնակցել փոխանակմանը։

Ուկրաինական կողմը դեռևս չի մեկնաբանել այս հայտարարությունը։

Հունիսի սկզբին Ստամբուլում կայացած բանակցությունների ժամանակ Ռուսաստանի և Ուկրաինայի պատվիրակությունները պայմանավորվել էին փոխանակել ծանր վիրավորում ունեցող 18-25 տարեկան զինվորականներին և գերիներին, ինչպես նաև միմյանց փոխանցել պատերազմում զոհված զինծառայողների մարմինները։ Գերիների փոխանակման գործընթացը մեկնարկել էր հունիսի 9-ին։

Ռուսական գերատեսչությունները նաև հայտնել էին, որ հունիսի կեսերին կողմերը սկսել են անժամկետ սանիտարական փոխանակումների գործընթացը, որի շրջանակներում միմյանց են փոխանցում վիրավորներին՝ առանց որևէ նախապայմանի և համաձայնեցման: 

Լուսանկարը՝ AFP / Scanpix / LETA