2025 թվականի հունիսի 18-ին, Երևանի քաղաքապետ Տիգրան Ավինյանը ֆեյսբուքյան իր էջում հրապարակեց տեսանյութ՝ տեղեկացնելով, որ Երևան քաղաքում շարունակվում է մեծ տեղեկատու դաշտով վահանակների ապամոնտաժումը։ Տեսանյութում նշվում էր, որ միայն 2024 թվականին ապամոնտաժվել է 550 այդպիսի վահանակ։

«Շարունակում ենք Երևանն ազատել ավելորդ գովազդային աղմուկից՝ վերականգնելով քաղաքային տեսքն ու ձևավորելով ավելի մաքուր և հարմարավետ միջավայր»,- տեսանյութին կից գրել էր Ավինյանը։

Մայրաքաղաքը գովազդային աղմուկից ազատելու գործընթացը սկսվեց 2023 թվականից։ Սկզբում փոփոխություններ կատարվեցին արտաքին գովազդի տեղադրման մասին Երևանի ավագանու 2009 թվականի նոյեմբերի 18-ի N 37-Ն որոշման մեջ։

Երևանի ավագանին սահմանեց նոր չափորոշիչներ, որոնց չհամապատասխանող գովազդային վահանակները ժամանակի ընթացում պետք է ապամոնտաժվեին։

• Նոր տարի, նոր գովազդ․ հունվարի 1-ից Երևանում նոր չափորոշիչներին չհամապատասխանող գովազդը կապամոնտաժվի

Այդ չափորոշիչներով սահմանվում է, որ օրինակ՝ գովազդային վահանակները կարող են տեղադրվել միայն 3.5 մետրից ավելի մեծ լայնություն ունեցող մայթերին։

Գովազդային վահանակները, ըստ իրենց տեղեկատու դաշտերի չափերի, լինում են մեծ, միջին և փոքր։ Մեծ գովազդային վահանակները ունենում են 3 մետրից ավել բարձրություն, 4 մետրից ավել լայնություն և 0.6 մետր խորություն։ Միջին չափի վահանակներն ունենում են առավելագույնը մինչև 3 մետր բարձրություն, 4 մետր լայնություն և 0.6 մետր խորություն: Իսկ փոքր չափի վահանակների առավելագույն բարձրությունը մինչև 3.5 մետրն է, լայնությունը՝ 2 մետր, խորությունը՝ 3 մետր։ 

Մեծ չափի տեղեկատու վահանակ Երևանում չի կարող տեղադրվել։

«Օնլիադ» ՍՊԸ-ի գովազդային վահանակը Աբովյան փողոցում

Երևանի քաղաքապետարանի աշխատակազմի առևտրի, ծառայությունների և գովազդի վարչության պետ Արմեն Առաքելյանը նշում է, որ հատկապես նախորդ տարի մեծ թափով են ընթացել մեծ տեղեկատվական դաշտով վահանակների ապամոնտաժման աշխատանքները։

«Մնացել են միայն Աշտարակի խճուղին և Իսակովի պողոտան։ Նաև հատուկենտ տեղեր՝ քաղաքի մի քանի հատվածներում, որոնք, հուսով ենք, մինչև տարվա վերջ կապամոնտաժենք»,- ասում է Առաքելյանը։

Ավագանու որոշման մեջ փոփոխություն կատարելուց հետո բոլոր տնտեսվարողները պետք է արտաքին գովազդի միջոցները համապատասխանեցնեին ստանդարտներին, հակառակ դեպքում՝ դրանք կապամոնտաժվեին։

Արտաքին գովազդ տեղադրելու թույլտվություն ստանալու համար անհրաժեշտ է քաղաքապետարան ուղարկել գովազդի միջոցի էսքիզը, նշել հասցեն, որտեղ պիտի տեղադրվի այն։ Եթե գովազդի միջոցի չափերը և տեղադիրքը համապատասխանում են չափորոշիչներին, ապա տրվում է թույլտվությունը։ Թույլտվությունները տրամադրվում են առավելագույնը 3 տարի ժամկետով։

Այս փոփոխություններից հետո՝ 2025 թվականին, սկսեցին գովազդային միջոցներ տեղադրելու թույլտվություններ տրվել ։ 2025թ.-ի ընթացքում տրամադրվել է փոքր և միջին չափի գովազդային վահանակի տեղադրման 22 թույլտվություն։

Գովազդային վահանակներ տեղադրելու թույլտվություն է ստացել երկու ընկերություն՝ «Ին շին» ՍՊԸ-ն և «Օնլիադ» ՍՊԸ-ն։

«Օնլիադ» ՍՊԸ-ն փոքր և միջին չափի 20 գովազդային վահանակ է տեղադրել Երևան քաղաքում։ Դրանցից 8-ը Աբովյան փողոցում է, մեկը՝ Տերյան-Կորյուն խաչմերուկում, մեկը՝ Խորենացի-Բեյրութ խաչմերուկում, մեկը՝ Հյուսիսային պողոտայում և այլն։

«Ին շին» ՍՊԸ-ն միայն երկու հասցեում գովազդային վահանակ տեղադրելու թույլտվություն ունի՝ Սայաթ-Նովայի և Խանջյան փողոցներում։

Այս երկու ընկերությունների սեփականատերերը ամենևին էլ պատահական մարդիկ չեն։

«Օնլիադ» ՍՊԸ-ն հիմնադրվել է 2006 թվականին։ Ընկերության համահիմնադիրը «Յունիգրաֆ-իքս» ՍՊԸ-ն էր, որի համասեփականատերը Ռուբեն Սադոյանն էր։

Սադոյանը 2017-2022 թվականներին զբաղեցրել է Վրաստանում Հայաստանի դեսպանի պաշտոնը։ 

2024 թվականին «Օնլիադ» ՍՊԸ-ի միանձնյա սեփականատեր է դարձել Ռուբեն Սադոյանի որդին՝ Ալֆրեդ Սադոյանը։ Նա կարիերայի սկզբում հոր ճանապարհով է գնացել՝ 2013-2018 թվականներին տարբեր պաշտոններ է զբաղեցրել Արտաքին գործերի նախարարությունում՝ հասնելով մինչև նախարարի օգնականի պաշտոնին։ Ալֆրեդ Սադոյանը 2021-2023 թվականներին աշխատել է Եվրասիական տնտեսական հանձնաժողովում՝ զբաղեցնելով Արդյունաբերության եւ ագրոարդյունաբերական համալիրի հարցերով նախարարի օգնականի պաշտոնը։

Բացի «Օնլիադ» ՍՊԸ-ից Ալֆրեդ Սադոյանին են պատկանում «Նեքստ ջեն սպորտս» ՍՊԸ-ն, «Ռոքեսթեյթ» ՍՊԸ-ն և «Տեսանկյուն» ՍՊԸ-ն։

«Նեքստ ջեն սպորտ» ՍՊԸ-ին է պատկանում վերջերս բացված «Յուվենտուսի հայկական ակադեմիան»։ Նախորդ տարի Կառավարությունը որոշել է «Հրազդան մարզահամալիր» ՓԲԸ-ն առանց մրցույթի օտարել Սադոյանին պատկանող «Նեքստ ջեն սպորտ» ՍՊԸ-ին։ Նույն որոշմամբ Ալֆրեդ Սադոյանի ընկերությանը անհատույց օգտագործման իրավունքով տրամադրվել էր նաև 1,85 հա մակերեսով անշարժ գույք Ավան վարչական շրջանում։ 

«Ին շին» ՍՊԸ-ն հիմնադրվել է 2023 թվականին։ Ընկերության հիմնադիրը Էդուարդ Այվազյանն է։ Նա 2024 թվականի նոյեմբերի 21-ին ընկերության իր մասնաբաժինը փոխանցել է Վազգեն Օհանջանյանին։

Ընկերությունից հեռանալուց 25 օր անց Էդուարդ Այվազյանը նշանակվել է Երևանի քաղաքապետարանին պատկանող «Երևանտրանս» ՓԲԸ տնօրենի ժամանակավոր պաշտոնակատար։

Այսպիսով, թեև Երևանի քաղաքապետարանը հայտարարում է մայրաքաղաքը գովազդային աղմուկից ազատելու և կանոնակարգված միջավայր ստեղծելու մասին, գործնականում այդ գործընթացը նոր հնարավորություններ է բացում ընկերությունների համար, որոնց կապերը պետական և քաղաքական շրջանակների հետ, ինչպես տեսնում ենք, պատահական չեն։