ԱՄՆ նախագահ Դոնալդ Թրամփը հայտարարել է, որ ակնկալում է՝ Իրանը կհամաձայնի լիովին հրաժարվել միջուկային ծրագրից։

«Ես հրադադար չեմ փնտրում, մենք ավելին ենք ուզում, քան պարզապես հրադադարը»,- Reuters գործակալության փոխանցմամբ հայտարարել է ԱՄՆ առաջնորդը՝ հավելելով՝ ցանկանում է, որ Իրանն ամբողջությամբ հրաժարվի միջուկային ծրագրից։

Թրամփն ընդգծել է, որ Իսրայելը չի պատրաստվում թուլացնել Իրանին հարվածների ինտենսիվությունը։ Ընդ որում, նա ազդարարել է իրավիճակի որոշակի փոփոխություն «առաջիկա երկու օրվա ընթացքում»։

Հիշեցնենք, որ հունիսի 16-ի ուշ երեկոյան Թրամփը լքել էր G7-ի գագաթնաժողովը՝ դա բացատրելով Մերձավոր Արևելքում տեղի ունեցող իրադարձություններով։ Դրանից ոչ շատ առաջ Truth Social-ում Թրամփը բոլորին կոչ էր արել «անհապաղ տարհանվել Թեհրանից»։

The Wall Street Journal պարբերականը հունիսի 16-ին, հղում անելով իր աղբյուրներին, գրել էր, որ Իրանի իշխանությունները ոչ պաշտոնական ալիքներով՝ արաբական երկրների միջոցով, ազդանշաններ են ուղարկել ԱՄՆ-ին միջուկային ծրագրի շուրջ բանակցությունները վերսկսելու պատրաստակամության մասին։

The Jerusalem Post-ն էլ, հղում անելով իր աղբյուրին, նշել էր, որ Թրամփը պատրաստվում է միջուկային գործարքի շուրջ «վերջին առաջարկը» անել Իրանին։ Դա ենթադրում է ուրանի հարստացումից ամբողջական հրաժարում, այդ թվում՝ քաղաքացիական նպատակներով կիրառումից։

Լուսանկարը՝ AP/Allison Robbert