Վրաստանի իշխող «Վրացական երազանք-Ժողովրդավարական Վրաստան» կուսակցության հիմնադիր և պատվավոր նախագահ Բիձինա Իվանիշվիլին այդ երկրի վարչապետի պաշտոնում ներկայացրել է կառավարության գործող ղեկավար Իրակլի Կոբախիձեի թեկնածությունը: Այդ մասին ճեպազրույցի ժամանակ հայտարարել է կուսակցության գործադիր քարտուղար Մամուկա Մդինարաձեն։

«Մեր կուսակցության կանոնադրության համաձայն՝ պատվավոր նախագահն ունի վարչապետի թեկնածու ներկայացնելու իրավունք և լիազորություն։ Ոչ մի անակնկալ չկա, որ Բիձինա Իվանիշվիլին վարչապետի թեկնածուի կարգավիճակում ներկայացրեց Իրակլի Կոբախիձեին։ Բնականաբար, քաղխորհուրդը լիովին աջակցեց դրան»,- ասել է Մդինարաձեն։

Նրա խոսքով՝ խորհրդարանի խոսնակի պաշտոնի թեկնածուն էլ կլինի օրենսդիր մարմնի գործող ղեկավար Շալվա Պապուաշվիլին:

Նոր գումարման խորհրդարանի առաջին նիստը կլինի նոյեմբերի 25-ին։ Այն բանից հետո, երբ խորհրդարանը կանցնի իր պարտականությունների կատարմանը, գործող կառավարությունը՝ վարչապետի գլխավորությամբ, ինքնաբերաբար հրաժարական կտա: Նախարարները և վարչապետը կմնան պաշտոնակատար մինչև նոր կառավարության նշանակումը:

Վրաստանում խորհրդարանական ընտրությունները կայացան այս տարվա հոկտեմբերի 26-ին: Իշխող «Վրացական երազանք» կուսակցությունը հաղթել է ձայների 53,93 տոկոսով և օրենսդիր մարմնում ստացել 150 մանդատից 89-ը: 5 տոկոսի շեմը հաղթահարել է ընդդիմադիր 4 կուսակցություն։ Խորհրդարան անցած ընդդիմադիր բոլոր կուսակցությունները հրաժարվել են ընդունել ընտրությունների արդյունքները և հայտարարում են, որ կհրաժարվեն իրենց մանդատներից: Ընդդիմության առաջնորդները նոյեմբերի 4-ից բողոքի ակցիաներ են անցկացնում՝ պահանջելով նոր ընտրություններ։ 

Լուսանկարը՝ «Վրացական երազանք» կուսակցության մամուլի ծառայության