Հայաստանը պաշտոնապես հետ չի կանչում իր ստորագրությունը եռակողմ հայտարարությունից, որը 2020 թվականին ստորագրվել էր Երևանի, Մոսկվայի և Բաքվի կողմից: Այս մասին ռուսական լրատվամիջոցների փոխանցմամբ հայտարարել է ՌԴ փոխվարչապետ Ալեքսեյ Օվերչուկը։ Ընդ որում, նրա խոսքով, տարածաշրջանում հաղորդակցությունների ապաշրջափակման եռակողմ աշխատանքային խմբի շրջանակներում առաջընթաց չկա արդեն շուրջ մեկուկես տարի։

«Հայաստանը ֆորմալ առումով դուրս չի գալիս եռակողմ հայտարարությունից և ստորագրությունը հետ չի կանչում, բայց միևնույն ժամանակ փոխվարչապետների մակարդակով եռակողմ աշխատանքային խմբի գծով տեղաշարժ երկու տարի արդեն գրեթե չկա, կամ առնվազն մեկուկես տարի՝ անցած տարվա ամռանից, այսպես ասենք»,- Ռուսաստանի առաջին ալիքին տված մեկնաբանության մեջ հայտարարել է Օվերչուկը։

Նրա խոսքով՝ «տարածաշրջանում տնտեսական և տրանսպորտային միջանցքների ապաշրջափակումը հնարավոր է միայն Ռուսաստանի մասնակցությամբ»։

2021 թվականի հունվարի 11-ին Մոսկվայում Ռուսաստանի, Հայաստանի և Ադրբեջանի ղեկավարների հանդիպման ժամանակ պայմանավորվածություն էր ձեռք բերվել տարածաշրջանային հաղորդակցությունների ապաշրջափակման վերաբերյալ: Այդ նպատակով որոշվել էր երեք երկրների փոխվարչապետների մակարդակով ստեղծել աշխատանքային խումբ, որը կկենտրոնանա տարածաշրջանում տրանսպորտային և տնտեսական կապերի հաստատման վրա:

Լուսանկարը՝ Виктория Виатрис / ТАСС