Իսրայելի պաշտպանության բանակը (ՑԱԽԱԼ) այսօր հերթական հարվածն է հասցրել Լիբանանին։ The Times of Israel-ը գրում է, որ այս անգամ թիրախում եղել է մայրաքաղաք Բեյրութը։ 

Իսրայելի պաշտպանության բանակը նաև հստակեցրել է, որ այս փուլում քաղաքացիական անձանց համար կանոնների որևէ փոփոխություն տեղի չի ունեցել: Հարձակման մանրամասներն իսրայելական կողմը խոստացել է հայտնել ավելի ուշ։ 

Մինչդեռ լիբանանյան լրատվամիջոցները գրում են, որ Իսրայելը հարվածել է Բեյրութի Դահիա թաղամասին, որը Հեզբոլահի հենակետն է: Իսրայելական լրատվամիջոցների փոխանցմամբ՝ հարձակման թիրախում եղել է Հեզբոլահի բարձր ռազմական հրամանատարության անդամ Իբրահիմ Ակիլը։ 

The Times of Israel-ը ուշադրություն է հրավիրել այն հանգամանքի վրա, որ պատերազմի մեկնարկից ի վեր Իսրայելը երրորդ անգամ է հարվածում Բեյրութին:

Հունվարին Բեյրութի վրա ՑԱԽԱԼ-ի հարձակման հետևանքով զոհվել էր ՀԱՄԱՍ-ի առաջնորդի տեղակալ Սալեհ ալ-Աուրին, իսկ հուլիսին ավիահարվածի հետևանքով սպանվել էր Հեզբոլահի ռազմական թևի ղեկավար Ֆուադ Շուքրը:

Հիշեցնենք, որ վերջին օրերին Լիբանանում Հեզբոլահի վրա մի շարք հարձակումներ են իրականացվել: Մասնավորապես, զանգվածաբար պայթել են խմբավորման անդամների փեյջերները և այլ սարքավորումներ, ինչի հետևանքով հազարավոր վիրավորներ կան:

Երեկ Իսրայելի պաշտպանության բանակը հարվածել էր Հեզբոլահի օբյեկտներին, որոնք տեղակայված էին Լիբանանի հարավում։ Դրա հետևանքով վնասվել էին խմբավորման արձակման տասնյակ կայանքներ։ 

Լուսանկարը՝ AP գործակալության