Հնդկաստանի արտաքին գործերի նախարարությունը այդ երկրում հավատարմագրված լրագրողներին ուղարկված հաղորդագրության մեջ հաստատել է, որ Հնդկաստանի վարչապետ Նարենդրա Մոդին կայցելի Ուկրաինա և Լեհաստան: Այդ մասին հայտնում է Reuters գործակալությունը։

Տարածված հաղորդագրության մեջ ասվում է, որ երկուշաբթի Հնդկաստանի արտաքին քաղաքական գերատեսչությունը հատուկ ճեպազրույց կանցկացնի, որը նվիրված կլինի Լեհաստան և Ուկրաինա Հնդկաստանի կառավարության ղեկավարի այցերին: Մոդիի ուղևորության ժամկետներն այս պահի դրությամբ հայտնի չեն։

Հնդկական լրատվամիջոցներն ավելի վաղ հայտնել էին Մոդիի՝ օգոստոսի վերջին Կիև հնարավոր այցի մասին: Մասնավորապես, NDTV հեռուստաընկերությունը նշել էր, որ վարչապետի այցը կկայանա օգոստոսի 23-ին, իսկ Indian Express թերթը, իր հերթին, տեղեկացրել էր, որ Մոդին օգոստոսի 24-ին կարող է մի քանի ժամով լինել Ուկրաինայում, որտեղ այդ օրը նշվելու է Անկախության օրը։ 

Ենթադրվում է, որ Լեհաստան Մոդիի այցը կկայանա օգոստոսի 21-ին։

Լուսանկարը՝ Ուկրաինայի նախագահի մամուլի ծառայության