Ադրբեջանն ու Ղազախստանը ռազմական ոլորտում համագործակցության մասին միջկառավարական փաստաթուղթ են ստորագրել: Այդ մասին հայտնել է Ադրբեջանի պաշտպանության նախարարության մամուլի ծառայությունը։ 

Վերջինիս փոխանցմամբ՝ փաստաթուղթը ստորագրվել է Բաքվում  երկու երկրների պաշտպանության նախարարներ Զաքիր Հասանովի և Ռուսլան Ժակսիլիկովի բանակցությունների արդյունքում:

Ժակսիլիկովը Զաքիրովին հրավիրել է հուլիսին Ակտաուում կայանալիք «Բիրլեստիկ-2024» օպերատիվ-մարտավարական հրամանատարաշտաբային զորավարժություններին հետևելու համար: Զորավարժություններին կմասնակցեն Ադրբեջանի, Ղազախստանի, Ղրղզստանի, Տաջիկստանի և Ուզբեկստանի զորախմբերը:

«Նախարարների հանդիպմանը հատուկ ընդգծվել է երկու երկրների զինծառայողների պրոֆեսիոնալիզմի բարձրացման նպատակով համատեղ զորավարժությունների անցկացման կարևորությունը»,- ասված է Ադրբեջանի պաշտպանության նախարարության հաղորդագրության մեջ։

Լուսանկարը՝ Ադրբեջանի ՊՆ մամուլի ծառայության