Ռուսաստանը չի խոչընդոտում Հայաստանին և Ադրբեջանին աջակցելու՝ ԱՄՆ դիվանագիտական ջանքերին: Նման հայտարարությամբ հանդես է եկել ԱՄՆ պետքարտուղարության պաշտոնական ներկայացուցիչ Մեթյու Միլլերը՝ պատասխանելով այն հարցին, թե արդյոք Ռուսաստանը խոչընդոտում է հայ-ադրբեջանական հարաբերությունների կարգավորման գործընթացում մյուս երկրների ջանքերին։

«Ռուսաստանը որևէ կերպ չի խանգարում մեզ հետամուտ լինել այն կարևոր դիվանագիտական ջանքերին, որոնք, մեր կարծիքով, անհրաժեշտ են Հայաստանի և Ադրբեջանի համար։ Մենք կշարունակենք դրանք իրականացնել»,- հայտարարել է ամերիկացի դիվանագետը։

Պատասխանելով այն հարցին, թե երբ է Միացյալ Նահանգները բանակցությունների նպատակով պատրաստվում ընդունել Հայաստանի ու Ադրբեջանի բարձրաստիճան ներկայացուցիչներին՝ Միլլերը նշել է, որ ԱՄՆ Պետքարտուղարությունը հայտարարություն կանի այն ժամանակ, երբ հանդիպման ժամկետները որոշված կլինեն։

Լուսանկարը՝ Associated Press գործակալության