Ադրբեջանն ու Հայաստանը ներկա փուլում ավելի քան երբևէ մոտ են խաղաղության պայմանագրին։ Այդ մասին, APA գործակալության փոխանցմամբ, Բաքվում հայտարարել է Թուրքիայի արտաքին գործերի նախարար Հաքան Ֆիդանը։

«Երեք տարի առաջ տեղի ունեցած 44-օրյա պատերազմից հետո տարածաշրջանում խաղաղության հասնելու պատմական հնարավորություն է ստեղծվել։ Մենք կարծում ենք, որ այսօր ավելի քան երբևէ խաղաղության պայմանագրին հասնելու նման հնարավորությունը դարձել է շատ ավելի իրական, և դրանից այլևս չպետք է խուսափել: Մենք ողջունում ենք դրական առաջընթացը Ադրբեջանի և Հայաստանի միջև մշտական խաղաղության պայմանագրի կնքման ու սահմանների որոշման ուղղությամբ»,- ասել է Ֆիդանը։

Թուրքիայի արտաքին քաղաքական գերատեսչության ղեկավարի խոսքով՝ «Արևմուտքում հայկական սփյուռքը շահագործում է հայ ժողովրդի ծանր վիճակը ու փորձում է որոշ երկրների հրահրել Ադրբեջանի դեմ դիրքորոշում որդեգրել»։ «Փոխարենը նրանք ավելի լավ կլիներ ջանքերն ուղղեին այնպիսի պայմանների ստեղծմանը, որոնց դեպքում Հայաստանի ժողովուրդը կկարողանա նորմալ հարաբերություններ հաստատել իր հարևանների հետ»,- նշել է թուրք նախարարը։ 

Հաքան Ֆիդանը տարածաշրջանից դուրս խաղացողներին առաջարկել է հետևել հավասարակշռության պահպանմանն ու հարաբերությունների կարգավորմանն ուղղված քաղաքականությանը։

«Այն առաջընթացը, որը ձեռք կբերվի Ադրբեջանի և Հայաստանի միջև, դրական ազդեցություն կունենա նաև Թուրքիայի և Հայաստանի միջև հարաբերությունների կարգավորման գործընթացի վրա»,- հավելել է նա։

Ֆիդանը խոչընդոտ չի տեսնում Անկարայի ու Երեւանի հարաբերությունների կարգավորման ճանապարհին։ «Թուրքիան մնում է Ադրբեջանի կողքին և պատրաստ է կարգավորման շրջանակներում կատարել ցանկացած խնդիր»,- եզրափակել է Թուրքիայի արտաքին քաղաքական գերատեսչության ղեկավարը։

Լուսանկարը՝ Թուրքիայի ԱԳՆ մամուլի ծառայության