Հոլանդական JDE Peet's ընկերությունը, որին պատկանում են սուրճի Jacobs, L'Or, Tassimo և Douwe Egberts ապրանքանիշները, մինչև տարեվերջ ռուսական շուկայում կդադարեցնի սուրճի ու թեյի օտարերկրյա ապրանքանիշների վաճառքը։ Այդ մասին, Коммерсантъ-ի փոխանցմամբ, նշվում է ընկերության՝ 2023 թվականի առաջին կիսամյակի ֆինանսական հաշվետվության մեջ։ 

Այդ լուրերի ֆոնին JDE-ն նվազեցրել է տարվա արդյունքներով շահույթի նպատակային ցուցանիշը։ Առաջին վեց ամիսների արդյունքներով ընկերությունն ունեցել է 185 միլիոն եվրոյի վնաս՝ Ռուսաստանում Jacobs սուրճի ապրանքանիշի ռեբրենդինգի պատճառով։

JDE-ի գլխավոր տնօրեն Ֆաբիեն Սայմոնը, սակայն, հայտարարել է, որ ընկերությունը չի պատրաստվում ամբողջությամբ հեռանալ Ռուսաստանից, իսկ ՌԴ տարածքում ընկերության աշխատանքը չի հակասում Արևմուտքի պատժամիջոցներին։ Ընկերության ռուսական ստորաբաժանման կազմում աշխատում է ավելի քան 900 մարդ։