Ռուսաստանի նախագահ Վլադիմիր Պուտինը 2023 թվականի հոկտեմբերին նախատեսում է մեկնել Չինաստան՝ մասնակցելու «Մեկ գոտի, մեկ ճանապարհ» համաժողովին։ Այդ մասին հայտնում է «Интерфакс»-ը՝ հղում անելով ՌԴ նախագահի օգնական Յուրի Ուշակովին։

«Հայտնի է, որ մենք հրավեր ենք ստացել և պատրաստվում ենք մեկնել Չինաստան, երբ հոկտեմբերին կկայանա «Մեկ գոտի, մեկ ճանապարհ» համաժողովը»,- ասել է Ուշակովը։ 

Բացի այդ, Պուտինի օգնականը չի բացառել, որ Պուտինը կարող է մեկնել Հնդկաստան G20-ի գագաթնաժողովին, որը նախատեսված է այս տարվա սեպտեմբերին։ «G20-ի մասով դեռևս պարզ չէ։ Հրավեր մենք ստացել ենք»,- հայտարարել է Ուշակովը։

Հուլիսին հայտնի դարձավ, որ Վլադիմիր Պուտինն անձամբ չի մեկնի Հարավաֆրիկյան Հանրապետություն՝ մասնակցելու ԲՐԻԿՍ-ի գագաթնաժողովին։ Նրա մասնակցությունը կլինի հեռավար։ Այդ խնդրանքով ռուսական կողմին դիմել էին Հարավաֆրիկյան Հանրապետության իշխանությունները, քանի որ Միջազգային քրեական դատարանը Պուտինի ձերբակալության օրդեր էր տվել։ ՀԱՀ-ը վավերացրել էր Հռոմի ստատուտը, ինչը ենթադրում է, որ ստիպված էր կատարել դատարանի պահանջը։ 

ՀԱՀ կառավարությունը զգուշացրել էր, որ Պուտինը կարող է ձերբակալվել, եթե ժամանի այդ երկիր։ 

ԲՐԻԿՍ-ի գագաթնաժողովին ռուսական պատվիրակությունը կգլխավորի արտաքին գործերի նախարար Սերգեյ Լավրովը։

Լուսանկարը՝ Կրեմլի մամուլի ծառայության