Եվրոպական երկրներում այն կարծիքին են, որ ՆԱՏՕ-ի հաջորդ գլխավոր քարտուղարը պետք է դառնա Եվրամիության անդամ երկրներից մեկի ներկայացուցիչը։ Այդ մասին գրում է The New York Times-ը՝ հղում անելով ՆԱՏՕ-ի բարձրաստիճան ներկայացուցիչներից մեկին։

Պարբերականի տվյալներով՝ այդպիսի տեսակետ ունեն Ֆրանսիան և ԵՄ անդամ մի շարք երկրներ։ Այդպիսով, պարբերականը նշում է, որ դա բացառում է Հյուսիսատլանտյան դաշիքի ղեկավարի պաշտոնում Մեծ Բրիտանիայի պաշտպանության նախարար Բեն Ուոլեսի նշանակումը։ 

Բացի այդ, դաշինքում կարծում են, որ Կենտրոնական Եվրոպայի և Մերձբալթյան տարածաշրջանի երկրներից թեկնածության առաջադրումը չի կարող հաստատվել, քանի որ դրանց ներկայացուցիչները չափից դուրս ագրեսիվ դիրքորոշում ունեն Ռուսաստանի նկատմամբ։ 

ՆԱՏՕ-ի ներկայիս գլխավոր քարտուղար Ենս Սթոլթենբերգի մանդատն ավարտվում է 2023 թվականի սեպտեմբերի 30-ին։

Ինչպես հայտարարել էր Սպիտակ տան ազգային անվտանգության խորհրդի ռազմավարական հաղորդակցությունների համակարգող Ջոն Քիրբին, ԱՄՆ նախագահ Ջո Բայդենը դեռևս չի որոշել, թե Վաշինգտոնը ում թեկնածությունը կպաշտպանի ՆԱՏՕ-ի գլխավոր քարտուղարի պաշտոնում։

Սթոլթենբերգը մայիսի 15-ին հաստատել էր, որ լիազորությունների ժամկետի ավարտից հետո մտադիր է լքել այդ պաշտոնը։ Ամենահավանական թեկնածուների շարքում նշվում է Ուոլեսը, որը մայիսի 18-ին գերմանական dpa գործակալությանը տված հարցազրույցում նշել էր, որ պատրաստ է գլխավորել դաշինքը։ Մեկ այլ թեկնածու է Կանադայի ֆինանսների նախարար և փոխվարչապետ Խրիստա Ֆրիլանդը։ Եվրոպական հանձնաժողովի նախագահ Ուրսուլա ֆոն դեր Լյայենը և Դանիայի վարչապետ Մետե Ֆրեդերիկսենը հայտարարել են, որ չեն հավակնում այդ պաշտոնին։ 

Դաշինքի գլխավոր քարտուղարի պաշտոնում թեկնածուի ընտրության հարցում մեծ դերակատարում ունի Միացյալ Նահանգները։

Լուսանկարը՝ Associated Press գործակալության