Ադրբեջանի նախագահ Իլհամ Ալիևը և Իտալիայի պաշտպանության նախարար Գուիդո Կրոզետոն Բաքվում կայացած բանակցությունների ժամանակ քննարկել են մի շարք ուղղություններով երկկողմ համագործակցության ընդլայնումը։ Այդ մասին հայտնել է Ադրբեջանի նախագահի մամուլի ծառայությունը։

Ալիևը դրական է գնահատել ադրբեջանա-իտալական կապերի զարգացման տեմպերը՝ ընդգծելով Հռոմի ներդրումը ՆԱՏՕ-ի և Եվրամիության հետ Ադրբեջանի համագործակցության ամրապնդման մեջ։ «Պետության ղեկավարը նշել է, որ մեր երկրների միջև տարբեր ոլորտներում իրականացվում է հաջող համագործակցություն, այդ թվում՝ էներգետիկ ոլորտում։ Այդ համատեքստում նախագահ Իլհամ Ալիևն ընդգծել է Հարավային գազային միջանցքի արդյունավետությունը»,- ասված է հաղորդագրության մեջ։

Իտալացի նախարարը շնորհակալություն է հայտնել Ալիևին ադրբեջանա-իտալական փոխհարաբերությունների մակարդակի գնահատման համար։ Հանդիպման ընթացքում Ալիևն ու Կրոզետոն «նշել են լավ հեռանկարներն էներգետիկայի, շինարարության, զբոսաշրջության, գյուղատնտեսության, պաշտպանական արդյունաբերության և մյուս ոլորտներում համագործակցության ընդլայնման շուրջ»։

Ադրբեջանական կողմի տարածած հաղորդագրության մեջ որևէ խոսք չկա Լաչինի միջանցքի շուրջ ստեղծված իրավիճակի կամ հայ-ադրբեջանական սահմանին առկա լարվածության քննարկման վերաբերյալ։

Լուսանկարը՝ Ադրբեջանի նախագահի մամուլի ծառայության