Ռուսաստանի իշխանությունները չեն զգուշացրել Չինաստանին այն մասին, որ պատրաստվում են լայնամասշտաբ ներխուժում սկսել Ուկրաինա, մինչ այն պահը, երբ Ռուսաստանի նախագահ Վլադիմիր Պուտինը հարձակման հրաման է արձակել։ Այդ մասին հայտնել է Financial Times թերթը՝ հղում անելով չինացի բարձրաստիճան 5 պաշտոնյայի։

Զրուցակիցներից մեկը պատմել է, որ Պուտինը Չինաստանի առաջնորդ Սի Ցզինպինի հետ հանդիպման ժամանակ, որը կայացել էր 2022 թվականի փետրվարի 4-ին՝ Ուկրաինա ներխուժումից 20 օր առաջ, ասել է, որ Ռուսաստանը «չի բացառում ցանկացած հնարավոր միջոցի ընդունում», եթե ռուսական տարածքի վրա լինի հարձակում, և դա հանգեցնի մարդասիրական աղետի։

Financial Times-ը նշում է, որ Պուտինի ու Սիի զրույցի սղագրությունը չի հրապարակվել, այդ իսկ պատճառով հայտնի չէ, թե ինչի մասին են նրանք խոսել։

2022 թվականի փետրվարի հանդիպումից հետո Վլադիմիր Պուտինը և Սի Ցզինպինը համատեղ հայտարարություն էին տարածել, որտեղ ընդգծել էին, որ երկու պետությունների միջև բարեկամությունը «սահմաններ չունի, իսկ համագործակցության մեջ չկան արգելված գոտիներ»։

Ամերիկյան The Washington Post թերթի տվյալներով՝ Ուկրաինա Ռուսաստանի ներխուժումից ի վեր Ռուսաստանը Չինաստանին բազմիցս խնդրել է տրամադրել ֆինանսական և տեխնոլոգիան օգնություն։ Պարբերականի աղբյուրները 2022 թվականի հունիսին այդ մասին բանակցությունները «լարված» էին անվանել։

Չինաստանը դիվանագիտական մակարդակում հանդես չի գալիս Ռուսաստանի դեմ, Պեկինը հանրայնորեն մեղադրում է Վաշինգտոնին՝ Եվրոպայում ՆԱՏՕ-ի ընդլայնման պատճառով Ուկրաինայում հակամարտության մեկնարկի մեջ, իսկ Ռուսաստանի դեմ պատժամիջոցները՝ անվանում անօրինական։

Փոխարենը, Չինաստանը ՄԱԿ-ի քվեարկություններում, որոնք առնչվում են Ուկրաինա ներխուժմանը, ձեռնպահ է քվեարկում և հայտարարում Ուկրաինայի տարածքային ամբողջականության պահպանման անհրաժեշտության մասին։ 

Լուսանկարը՝ Alexander Zemlianichenko/AP