Ադրբեջանը տրամադրված է Հայաստանի հետ հարևանական հարաբերությունների կարգավորմանը։ Այդ մասին հայտարարել է Ադրբեջանի արտաքին գործերի նախարար Ջեյհուն Բայրամովը Թուրքմենստանի Թուրքմենբաշի քաղաքում Ադրբեջանի, Թուրքմենստանի և Թուրքիայի արտաքին գործերի նախարարների հանդիպման ժամանակ։

«Ադրբեջանը վճռականորեն տրամադրված է Հայաստանի հետ երկկողմ հարաբերությունների կարգավորմանը՝ միմյանց ինքնիշխանության, տարածքային ամբողջականության և սահմանների անձեռնմխելիության փոխադարձ ճանաչման ու հարգանքի հիման վրա՝ հակամարտության էջը փոխարինելու փոխշահավետ համագործակցությամբ, նորմալ հարևանական հարաբերություններով»,- հայտարարել է Բայրամովը։

Նա հավելել է, որ ադրբեջանական կողմը Երևանին փոխանցել է խաղաղության պայմանագրի տեքստի թարմացված առաջարկները և առաջիկա շաբաթներին սպասվում է երկու երկրների ԱԳ նախարարների հանդիպում՝ քննարկումները շարունակելու համար։ Բայրամովի խոսքով՝ այս հարցում Ադրբեջանի դիրքորոշումը «հետևողական և սկզբունքային է, որը հիմնված է միջազգային իրավունքի և արդարադատության վրա»։

«Հույս ունենք, որ խաղաղության հասնելու նպատակով մեր կողմից ձեռնարկվող քայլերին Հայաստանը, վերջապես, կպատասխանի անհրաժեշտ քաղաքական կամքով և գործնական քայլերով։ Հայաստանի կողմից ստանձնած պարտավորությունների անհետաձգելի կատարումը, Ադրբեջանի դեմ տարածքային անհիմն պահանջներից հրաժարումը և նորմալ հարևանական հարաբերությունների կառուցման գործնական քայլերը կարևոր պայման են, որպեսզի կարգավորման գործընթացը հասնի տրամաբանական արդյունքի»,- ասել է ադրբեջանցի նախարարը։

Չնայած Բաքվի, իբր, խաղաղասիրական հայտարարություններին, արդեն երրորդ օրն է, ինչ քաղաքացիական հագուստով մի քանի հարյուր ադրբեջանցիներ Շուշիի հատվածում փակել են Գորիս-Ստեփանակերտ ավտոճանապարհը` Արցախի բնակչությանը պահելով շրջափակման մեջ։

Վերջիններիս փոխանցմամբ՝ նրանք, իբր, բողոքում են «հայերի կողմից Լեռնային Ղարաբաղի բնական պաշարների ապօրինի օգտահանման դեմ»։ Ադրբեջանցիները հանդիպում են պահանջում ռուսական խաղաղապահ առաքելության հրամանատար, գեներալ-մայոր Անդրեյ Վոլկովի հետ, սակայն վերջինս անտեսում է նրանց պահանջը։ Ռուսական ուժերը նաև հատուկ տեխնիկա են բերել Շուշիի մոտ և տեղադրել մոդուլային զորանոցներ։

Երեկ երեկոյան հայտնի դարձավ, որ Ադրբեջանը խափանել է Արցախի գազամատակարարումը։ «Եղանակային նման պայմաններում երկնագույն վառելիքի մատակարարման դադարեցումը հումանիտար ու տնտեսական ահաբեկչություն է, որը հետևողականորեն իրականացնում է Ադրբեջանը Արցախի խաղաղ բնակիչների դեմ: Իրավիճակի մասին հանրությանը պարբերաբար տրամադրվելու է տեղեկատվություն»,- նշված է Արցախի տեղեկատվական շտաբի տարածած հաղորդագրությունում։

Լուսանկարը՝ Ադրբեջանի ԱԳՆ մամուլի ծառայության