Դեկտեմբերի 10-ի երեկոյան Ուկրաինան հարվածներ է հասցրել Ռուսաստանի կողմից բռնազավթված Մելիտոպոլ քաղաքին։ Մելիտոպոլի ուկրաինական քաղաքապետ Իվան Ֆյոդորովը գրել է քաղաքի արևելքում և հարավում ուժեղ հրդեհների մասին։

Նրա տվյալներով՝ հարվածը, մասնավորապես, հասցվել է ռուսաստանցի զինվորականների հավաքատեղու վրա։ Ըստ ուկրաինական կողմի՝ ռուսաստանցիներն ունեն մինչև 200 զոհ։ Ֆյոդորովը գրում է, որ վիրավորներին տեղափոխելու համար ռուսական կողմն ստիպված է եղել Ղրիմից ներգրավել շտապ օգնության մեքենաներ։

Ուկրաինայի Զապորոժյեի մարզի բռնազավթված հատվածում ռուսական վարչակազմի ղեկավար Եվգենի Բալիցկին հաստատել է Մելիտոպոլի ուղղությամբ հարվածները։ Նրա խոսքով՝ հրթիռակոծման է ենթարկվել հանգստի բազան, որտեղ «շաբաթ երեկոյան ընթրում էին մարդիկ, խաղաղ բնակիչներ, աշխատում էր բազայի անձնակազմը»։ Բալիցկու խոսքով՝ հայտնի է երկու զոհի և տասը տուժածի մասին։

Իր հերթին Զապորոժյեի օկուպացիոն իշխանությունների ներկայացուցիչ Վլադիմիր Ռոգովը հայտարարել է, որ Մելիտոպոլի հանգստի բազան հրթիռակոծվել է HIMARS տեսակի հրթիռային համալիրներից։ РИА Новости-ն, մեջբերելով Ռոգովի հայտարարությունը, գրել է, որ ուկրաինական երկու հրթիռները հաջողվել է խոցել, մյուսները հասել են իրենց թիրախներին։ 

Ուկրաինայի զինված ուժերի հրամանատարությունը դեռևս չի մեկնաբանել Մելիտոպոլի հրթիռակոծման լուրերը։

Լուսանկարը՝ Reuters գործակալության