ՆԱՏՕ-ի գլխավոր քարտուղար Ենս Սթոլթենբերգը Ուկրաինայի նախագահ Վլադիմիր Զելենսկու հետ քննարկել է Կիևին հետագա օգնությունը։ Այդ մասին նորվեգացի պաշտոնյան հայտարարել է թվիթերյան իր միկրոբլոգում։

«Խոսել եմ նախագահ Զելենսկու հետ և գովաբանել խիզախ ուկրաինացի ժողովրդին ու զորքերին՝ ռուս ագրեսորներից իրենց տարածքերնն ազատագրելու գործում տպավորիչ առաջընթացի համար։ Ռուսաստանը պետք է դադարեցնի իր սկսած պատերազմը։ ՆԱՏՕ-ն կաջակցի և կուժեղացնի Ուկրաինային աջակցությունն այնքան, որքան կպահանջվի»,- խոստացել է նա։

Spoke with President @ZelenskyyUa and praised the brave Ukrainian people & forces for the impressive progress in regaining their territory from Russian aggressors. #Russia must stop the war it has started. #NATO will sustain & step up support for #Ukraine for as long as it takes.

— Jens Stoltenberg (@jensstoltenberg) October 5, 2022

Ավելի վաղ, Ուկրաինայի նախագահի գրասենյակի ղեկավար Անդրեյ Երմակը թվարկել էր այն երկրները, որոնք աջակցում են ՆԱՏՕ-ին Ուկրաինայի արագացված ընթացակարգով անդամակցության դիմումին։ Նրա խոսքով՝ այդ երկրների թվում են Կանադան, Լեհաստանը, Սլովակիան, Չեխիան, Ռումինիան, Լիտվան, Էստոնիան, Լատվիան, Խորվաթիան, Մոնտենեգրոն և Հյուսիսային Մակեդոնիան։

Սեպտեմբերի 30-ին Ուկրաինայի նախագահը հայտարարել էր, որ իր երկիրը դիմում է ներկայացնում ՆԱՏՕ-ին արագացված ընթացակարգով անդամակցության համար։

Նախօրեին, Վլադիմիր Զելենսկին նաև ստորագրել էր Ռուսաստանի նախագահ Վլադիմիր Պուտինի հետ բանակցություններից հրաժարման հրամանագիրը։ ՌԴ նախագահի մամուլի քարտուղար Դմիտրի Պեսկովը մամուլի համար ճեպազրույցի ժամանակ հետևյալ կերպ էր մեկնաբանել Պուտինի հետ բանակցություններից Զելենսկու հրաժարումը։ «Հիմա կսպասենք կամ գործող նախագահի դիրքորոշման փոփոխությանը, կամ էլ արդեն կսպասենք Ուկրաինայի հաջորդ նախագահին, որը կփոխի իր դիրքորոշումը ի շահ ուկրաինացի ժողովրդի»,- ասել էր Պեսկովը։

Լուսանկարը՝ Pascal Rossignol/Reuters