Կառավարությունը սոցիալական աջակցություն կտրամադրի «Երևանի պահածոների գործարան» ՓԲԸ-ում 2022 թվականի օգոստոսի 14-ին տեղի ունեցած պայթյունի հետևանքով զոհերի (այդ թվում՝ գտնվելու վայրը անհայտ անձի) ընտանիքներին և վիրավորում ստացած անձանց։

Առաջարկվում է սոցիալական աջակցությունը տրամադրել՝

1․ վիրավորում (խեղում, վնասվածք) ստանալու դեպքում՝

• հիվանդանոցային պայմաններում մինչև երեք օր բուժման մեջ գտնված անձանց դեպքում՝ 150 000 դրամի չափով.
• հիվանդանոցային պայմաններում երեք և ավելի օր բուժման մեջ գտնված անձանց դեպքում՝ 300 000 դրամի չափով․

2․ զոհված անձանց (այդ թվում գտնվելու վայրը անհայտ անձի) ընտանիքների դեպքում՝ յուրաքանչյուր զոհվածի համար՝ 3 մլն դրամի չափով:

Կառավարության նիստը վարող փոխվարչապետ Համբարձում Մաթևոսյանը հիշեցրեց, որ երեկ ուժգին քամու հետևանքով «Սուրմալու»-ում փլուզումներ են եղել։

Արտակարգ իրավիճակների նախարարի առաջին տեղակալ Արտյուշ Գրիգորյանը նշեց, որ փլուզման տակ մնացած տրանսպորտային միջոցներում քաղաքացիներ չեն եղել, բայց 3 քաղաքացի վնասվածքներ է ստացել և տեղափոխվել բժշկական կենտրոններ, մի քանի ժամից նրանք դուրս են գրվել։

Ըստ Գրիգորյանի՝ տարածքն այժմ սահմանազատվել է, իրականացվում են մաքրման աշխատանքներ։