Համայնքներին պետական բյուջեով արդեն իսկ նախատեսված սուբվենցիաներից բացի այլ սուբվենցիաներ տրամադրելու նպատակով Արարատի, Գեղարքունիքի, Լոռու, Շիրակի, Սյունիքի և Վայոց ձորի մարզպետարաններին կհատկացվի 693,7 մլն դրամ։ Որոշումն ընդունվեց Կառավարության սեպտեմբերի 8-ի նիստում։

Տարածքային կառավարման և ենթակառուցվածքների նախարար Գնել Սանոսյանի խոսքով՝ ընդհանուր 15 ծրագիր է իրականացվել՝ 11 բնակավայրերում։ Ծրագրերից 12-ը քննարկվել և հաստատվել են 2021 թ․, իսկ 3-ը՝ 2022-ին: Նշված ծրագրերի շինարարական աշխատանքների և գույքի ձեռքբերման գործընթացներն ավարտվել են, և Կառավարությունն այժմ ֆինանսավորում է։

ՏԿԵ նախարարը նշեց, որ Արարատի մարզում մեկ ծրագիր է՝ 71 մլն դրամ արժեքով, Գեղարքունիքում՝ 3 ծրագիր 70 մլն դրամ արժեքով, Լոռու մարզում՝ 1 ծրագիր, 23 մլն դրամ, Շիրակում՝ 1 ծրագիր, 29 մլն դրամ, Սյունիքում՝ 4 ծրագիր, 353 մլն դրամ և Վայոց Ձորում 5 ծրագիր՝ 145 մլն դրամ արժողությամբ։

Ըստ Սանոսյանի՝ այս տարվա հունվարից մինչև հիմա 303 ծրագրի համար Կառավարությունն արդեն տրամադրել է 8 մլրդ 758 մլն դրամ։

Նիստը վարող փոխվարչապետ Համբարձում Մաթևոսյանը հետաքրքրվեց 2023-ի սուբվենցիոն ծրագրերով։

ՏԿԵ նախարարը հիշեցրեց, որ կարգը փոխել են, և 2023 թ.-ի բոլոր հայտերն ընդունել են այս տարի։

«Ունենք բավական մեծ թվով հայտեր, ընդհանուր՝ 112 մլրդ դրամի, որն աննախադեպ մեծ է»,- ասաց Գնել Սանոսյանը՝ հիշեցնելով, որ նախորդ տարի ստացել են 377 հայտ՝ ընդհանուր 76 մլրդ դրամ արժեքով։