Եվրամիության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը ողջունել է նախօրեին Բրյուսելում Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի եռակողմ հանդիպումը։ Այդ մասին նա գրառում է արել թվիթերյան իր միկրոբլոգում։

Welcome 4th meeting btwn @CharlesMichel @azpresident & @NikolPashinyan. Important to keep working to advance on a peace treaty & continue with efforts on humanitarian & connectivity areas. EU continues to be fully engaged in support of peaceful, secure & prosperous South Caucasus https://t.co/7q9FTDYaO7

— Josep Borrell Fontelles (@JosepBorrellF) September 1, 2022

«Ողջունում եմ չորրորդ հանդիպումը, որն անց է կացվել Եվրոպական խորհրդի նախագահ Շառլ Միշելի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի միջև։ Կարևոր է շարունակել աշխատանքը խաղաղության պայմանագրի առաջխաղացման համար, ջանքեր գործադրել մարդասիրական և հաղորդակցության ոլորտներում։ ԵՄ-ն շարունակում է աջակցել խաղաղասեր, անվտանգ և բարգավաճող Հարավային Կովկասին»,- գրել է Բորելը։

Հիշեցնենք, որ նախօրեին Բրյուսելում երեք առաջնորդների հանդիպման ժամանակ պայմանավորվածություն էր ձեռք բերվել ակտիվացնել առարկայական աշխատանքը Հայաստանի և Ադրբեջանի միջև միջպետական հարաբերությունները կարգավորող խաղաղ համաձայնագրի առաջխաղացման ուղղությամբ։ Բացի այդ, Շառլ Միշելի անունից տարածված հաղորդագրության մեջ, Հայաստանի և Ադրբեջանի արտաքին գործերի նախարարներին հանձնարարվել էր մեկ ամսվա ընթացքում հանդիպում ունենալ այդ համաձայնագրի սևագիր տարբերակի վրա աշխատելու համար։

Հանդիպման ժամանակ քննարկվել էր նաև հայ գերիների վերադարձի հարցը։ «Նախագահ Միշելը կարեւորել է Ադրբեջանում պահվող հայ անձանց հետագա ազատ արձակումը»,- հստակորեն ընդգծվում էր հայտարարության մեջ։ Բացի այդ, նշվում էր, որ Եվրամիությունը կշարունակի ներգրավվել այս հարցերում։

Վերջին անգամ նրանք հանդիպել էին այս տարվա մայիսի 22-ին՝ դարձյալ Բրյուսելում և պայմանավորվել հայ-ադրբեջանական սահմանի սահմանազատման և սահմանագծման գործընթացի համար ստեղծել երկկողմ աշխատանքային խմբեր, ինչպես նաև՝ հանձնարարել երկու երկրների արտաքին գործերի նախարարներին սկսել խաղաղության համաձայնագրի շուրջ բանակցությունները։

Լուսանկարը՝ Thierry Monasse / Getty Images