Կառավարությունը պահուստային ֆոնդից Առողջապահության նախարարությանը 31 մլն 125 000 դրամ կհատկացնի 44-օրյա պատերազմում զոհված անձանց թվով 50 ոսկրային հյուսվածքների փորձանմուշների ԴՆԹ նույնականացում իրականացնելու համար։

Ըստ որոշման նախագծի՝ զոհված զինծառայողների դիակների և մասունքների ԴՆԹ նույնականացման փորձաքննությունները 2020թ․ հոկտեմբերից մինչև 2022 թ․ կատարվել են ԱՆ «Դատաբժշկական գիտագործնական կենտրոն» ՊՈԱԿ-ի մոլեկուլային գենետիկայի փորձաքննությունների բաժնում։

«Այս ընթացքում նույնականացվել է բազմաթիվ անճանաչելի ձևի փոփոխված, մասնահատված, կմախքացած, այրված աճյուններ և մասունքներ, որոնց արդյունքում ունեցել ենք անհայտ համարվող զինծառայողների դիակների և մասունքների ինքնության պարզում։  

«Դատաբժշկական գիտագործնական կենտրոն» ՊՈԱԿ-ում գտնվող թվով 100 (բարդ նմուշ) ոսկրային փորձանմուշներ են ուղարկվել Նիդերլանդների Թագավորություն ICMP կազմակերպություն ԴՆԹ նույնականացումը կատարելու նպատակով: Ֆինանսավորումը իրականացվել է USAID կազմակերպության կողմից»,- ասված է որոշման նախագծի հիմնավորման մեջ։

Սակայն, ըստ նախարարության, դեռևս առկա են բարդ, վնասված, արտաքին գործոնների ազդեցությունից որոշակի կազմափոխված ոսկրային հյուսվածքներ, որոնցից չի հաջողվում անջատել անձի նույնականացման համար պիտանի ԴՆԹ բնութագրեր: Այդ նպատակով անհրաժեշտ է ևս 50 ոսկրային հյուսվածքների փորձանմուշներ ուղարկել Նիդերլանդների Թագավորություն՝ Անհայտ Կորածների Միջազգային Հանձնաժողովի համապատասխան ԴՆԹ փորձաքննություների լաբորատորիա, վնասված ոսկրային հյուսվածքներից ԴՆԹ անջատման և գենետիկական լիարժեք բնութագիր ստանալու համար։