«Երեկ Ազգային ժողովի հարցուպատասխանի ժամանակ ես հայտարարեցի, որ 2021թ.-ի մայիսից ի վեր, Հայաստանի և Ադրբեջանի սահմանների միջև դեմարկացիայի և դելիմիտացիա իրականացնելու վերաբերյալ երեք առաջարկ է հնչել Ռուսաստանի կողմից, և երեքն էլ, ըստ էության, մեզ համար ընդունելի են եղել և շարունակում են ընդունելի մնալ։ Երեկ իմ հայտարարություններից հետո ՌԴ պաշտպանության նախարարությունը դեմարկացիայի և դելիմիտացիայի նախապատրաստական փուլի վերաբերյալ հանդես է եկել առաջարկություններով»,- այս մասին Կառավարության նոյեմբերի 18-ի նիստում հայտնեց վարչապետ Նիկոլ Փաշինյանը։

Ըստ նրա՝ այդ առաջարկությունները Հայաստանի համար ընդունելի են։ Փաշինյանը խնդրեց Սուրեն Պապիկյանին Ռուսաստանի պաշտպանության նախարարի հետ ճշգրտել մանրամասները, որպեսզի առաջարկներն իրագործվեն։