Ռուսաստանի Դաշնության նախագահ Վլադիմիր Պուտինը մարտի 11-ին և 12-ին հեռախոսազրույցներ է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ։ Այս մասին հաղորդում է Կրեմլի պաշտոնական կայքը։

Զրույցի ընթացքում քննարկվել են 2020 թվականի նոյեմբերի 9-ին և 2021 թվականի հունվարի 11-ին ձեռք բերված պայմանավորվածությունների իրականացման գործնական քայլերը։

«Գոհունակությամբ ընդգծվել է, որ հրադադարի ռեժիմը պահպանվում է, իսկ տարածաշրջանում իրավիճակը ընդհանուր առմամբ կայուն է և հանգիստ։ Նիկոլ Փաշինյանն ու Իլհամ Ալիևը բարձր են գնահատել շփման գծի և Լաչինի միջանցքի երկայնքով տեղակայված ռուսական խաղաղապահ զորախմբի արդյունավետ գործողությունները»,- ասվում է Կրեմլի հաղորդագրությունում։

Քննարկվել են նաև Հարավային Կովկասում տնտեսական և տրանսպորտային կապերի ապաշրջափակման հարցերը։ Այդ համատեքստում դրական է գնահատվել երեք երկրների համանախագահությամբ գործող եռակողմ աշխատանքային խմբի գործունեությունը։

Ըստ Կրեմլի հաղորդագրության՝ Պուտինը մտքեր է փոխանակել նաև ռուս-ադրբեջանական և ռուս-հայկական համագործակցության շուրջ։

Լուսանկարը՝ Alexei Nikolskly/Russian president's press service/TASS