Փետրվարի 13-ին ուժի մեջ են մտել «Կաթի և կաթնային արտադրանքի անվտանգության մասին» 033/2013 տեխնիկական կանոնակարգի փոփոխությունները։ Դրանք ընդունվել են Եվրասիական տնտեսական հանձնաժողովի 2020թ № 62 որոշմամբ։

Մասնավորապես, տեխնիկական կանոնակարգում կատարված փոփոխություններով՝ վերականգնված կաթ է համարվում պատրաստի կաթնային ապրանքը՝ սպառողական փաթեթավորմամբ, կամ կաթի վերամշակման արտադրանքի համար օգտագործվող հումքը։

Բացի այդ, կանոնակարգում սահմանվում են պահանջներ արտադրանքի նույնականացման և անվտանգության ցուցանիշների, ինչպես նաև՝ համապատասխան մակնշման մասով, որոնք մինչ այդ չկային։

  Վերականգնված կաթը կաթի փոշու և զտված խմելու ջրի խառնուրդ է, որը ենթարկվում է նույն վերամշակման, ինչ սովորական կաթը՝ ունենալով համային համանման հատկություններ և պահպանման ժամկետ։ 

Գնային առումով այն բավական մատչելի է կաթից։

Դա, ըստ ԵՏՀ-ի, հնարավորություն կտա բարեխիղճ արտադրողներին արտադրանքը շուկա հանել ՝ որպես վերականգնված կաթ. մինչ օրս արտադրողները վերականգնված կաթը մակնշում էին՝ «կաթնային ըմպելիք» անունով, ինչը, Հանձաժողովի գնահատմամբ, այնքան էլ «գրավիչ չէր» սպառողների համար։

Նշենք, որ դեռևս 2014թ. մայիսի 1-ից ուժի մեջ էին մտել ՄՄ/ՏԿ 033/2013 կանոնակարգի փոփոխությունները, որով կաթ արտադրողներին հնարավորություն էր տրվել շրջանառության մեջ հանել վերականգնված կաթը, սակայն այդ ժամանակվանից դրա նկատմամբ հստակ պահանջներ սահմանված չէին։