Հայաստանցի դիտորդները չափազանց հանդուրժողաբար են տրամադրված ԼՂ ԱԺ ընտրություններում տեղի ունենալիք խախտումների նկատմամբ: Նրանց ԼՂ ԿԸՀ-ն հավատարմագրել է որպես միջազգային դիտորդներ: Ընտրություններին հավատարմագրվել են ինչպես Հայաստանի կուսակցությունները, այնպես էլ հասարակական կազմակերպությունները: «Մենք շատ բան չենք տեսնելու»,-տեղի ունենալիք խախտումների մասին ասում է Արտաշես Գեղամյանի կուսակցության' «Ազգային Միաբանության» ներկայացուցիչը: «Ես էլ չեմ տեսնելու»,-երեկ երեկոյան ԼՂ ԿԸՀ մամուլի ծառայությունում ասաց «Արդարություն» խմբակցության անդամ Արշակ Սադոյանը: Մեկ այլ դիտորդ անկեղծորեն ասաց, որ խախտումներ հայտնաբերելու դեպքում «ինչ-որ բան օբյեկտիվորեն պետք է գրել»: Վերջինս վստահեցնում էր, որ «կշռաքարին է դրած Ղարաբաղի իմիջը»: Մի քանի դիտորդներ համաձայն էին անկեղծանալ, սակայն իրենց անունները չհապարակելու պայմանով: Նրանցից մեկը' նախկին երաժիշտ, ասում է.«Ասենք թե կեղծեցին, ի՞նչ պիտի գրենք, որ կեղծեցի՞ն»: Այնուհետեւ ավելացրեց. «Բոլորս էլ պիտի գրենք,որ փոքրաթիվ խախտումներ են եղել»: Նախկին երաժիշտը վստահեցնում է, որ նախ եւ առաջ պետք է մտածել այն մասին, թե դրսի համար ի՞նչ հետեւանքներ կունենա կեղծիքների արձանագրումը: ՀՀ ԱԺ պատգամավոր Հմայակ Հովհաննիսյանն իր համար արդեն փաստել է, որ ԼՂ ԱԺ ընտրությունները «10 գլխով ավելի ժողովդավարական կլինեն, քան' Հայաստանում»: Մեկ այլ դիտորդ, այս դեպքում ՀՀ նախկին իշխանություններից, ասում է, որ «էս սաղ իմիտացիա ա»: «Հիմի Ղարաբաղը պետք է ռազմական դրության մեջ լիներ, քանի որ էդ դրությունը չկա, ընտրություններ են անում»,-ավելացրեց հհշականը: Նա վստահեցրեց, որ շատ լավ գիտի, որ Ղարաբաղում «Հայաստանից բեթար կեղծիքներ են լինելու»:

Կեղծիքների հանդեպ հաշտվողականության ուրվականը թափառում է նաեւ Արցախի ՀՅԴ ԿԿ կառույցում: ՀՅԴ Արցախի ԿԿ քարտուղար Ժիրայր Շահիրջանյանը նախընտրական քարոզարշավում արձանագրել է բազմաթիվ խախտումներ, բայց համոզված է, որ «հիմիկվանից ընտրությունների արդյունքները կասկածի տակ դնելը ճիշտ չէ»: Պարոն Շահիրջանյանն ասում է.«Եթե տեսնենք,որ իսկապես կեղծիքներ են եղել, իհարկե բողոքարկելու ենք»: Իսկ բողոքարկելու ժամանակ մտածելու՞ են Ղարաբաղի վարկանիշի մասին: «Եթե մեզանից պահանջվի,որ լռենք, այսինքն, գիտակցենք,որ դրանով խաթարվելու է Ղարաբաղի վարկանիշը, մենք լռելու ենք»,-ասաց Արցախի ՀՅԴ ԿԿ կառույցի քարտուղարը:

Ամերիկյան դիտորդներից մեկը, որն իր առաքելությունն է իրականացնում ոչ պաշտոնապես, տեղեկացրեց, որ խախտումների 90 տոկոսն արդեն կատարվել է: Նա վկայակոչեց այն փաստը, որ տեղամասային ընտրատարածքային հանձնաժողովներում ընդդիմությունը չունի նախագահ, տեղակալ եւ քարտուղար: Ամերիկյան մեկ այլ դիտորդ լսելով, որ դեմոկրատական ընտրությունների անհրաժեշտությունը եւ Ղարաբաղի վարկանիշը կշեռքի երկու տարբեր նժարներին է դրված, ասաց. «Եթե դու հիվանդ ես, պետք է դեղ խմես»:

Իրենց հերթին ամերիկյան դիտորդները շաբաթ օրը ուշադրություն հրավիրեցին մեկ այլ աղաղակող այնպիսի խախտման վրա, ինչպիսին ԼՂ նախագահ Արկադի Ղուկասյանի ուրբաթօրյա ուղերձն է, որտեղ Ղուկասյանը ընդդիմության ներկայացուցիչների ելույթը համարում է «խոսքի թեփուկ» եւ հույս հայտնում, որ ժողովուրդը կկարողանա «վերացական ժխտողականությունը տարբերել կառուցողական քննադատությունից»: Արկադի Ղուկասյանը նաեւ ավելացրել է.«Ի րավիճակի հետընտրական ապակայունացման ցանկացած փորձ, ում կողմից էլ որ այն ձեռնարկվի, կստանա արժանի գնահատական »: «ՀՅԴ-Շարժում-88» դաշինքի տղաները գիտեն, որ Ղուկասյանը իր կուսակցության' ԱԺԿ-ի եւ «Ազատ Հայրենիքի» տղաներին կամ ակտիվիստներին չի սպառնա: Ամերիկացի դիտորդները հայտարարում են, որ ԼՂ նախագահը ահաբեկել է ժողովրդին եւ փորձ արել նրան տրամադրել ընդդիմության դեմ: «Նման բան իրավունք չուներ անելու երկրի նախագահը»,-ասաց դիտորդներից մեկը, որը դիտորդական առաքելություններ է իրականացրել երրորդ աշխարհի, այս դեպքում' Լատինաամերիկյան երկրներում: Հայաստանցի դիտորդները առ այս պահը, այսինքն, ընտրությունների օրը ուշադրություն չէին դարձրել Ղուկասյանի այդ մտքերին:

Մհեր Արշակյան
Ստեփանակերտ