Երևանի քաղաքապետ Տարոն Մարգարյանը մասնակցել է Նոր-Նորք վարչական շրջանի 4-րդ զանգվածում մինի ֆուտբոլի խաղադաշտի բացմանը: Բնակիչների խոսքով` դեռ խորհրդային տարիներից անխնամ մնացած տարածքի տեղում միջազգային չափորոշիչներին համապատասխան կառուցված դաշտը պատված է  արհեստական խոտածածկով, ինչը թույլ կտա երեխաներին ֆուտբոլ խաղալ տարվա բոլոր եղանակներին:

Շինբարեկարգման համալիր ծրագրի շրջանակում առողջ ապրելակերպի եւ պատանի երեւանցիների մարզական հաջողություններին նպաստելու նպատակով  2011 թվականի քաղաքապետարանի ծրագրով մայրաքաղաքում կառուցվել են նման եւս 10 խաղադաշտ: 

 «Մենք շարունակելու ենք բակերի բարեկարգման ծրագրերը, դրանում կարող եք վստահ լինել: Մեր նպատակն է, որ մեր սիրելի քաղաքը բարեկարգ տեսք ունենա, ինչին, վստահ եմ, կհասնենք համատեղ ուժերով: Ձեզնից էլ ակնկալում եմ, որ սրտացավորեն վերաբերեք կատարած աշխատանքին»,- բնակիչների հետ զրույցում նշել է Տարոն Մարգարյանը:

Շնորհակալություն հայտնելով` բնակիչները քաղաքապետին վստահեցրել են, որ մշտապես կհետեւեն տարածքի մաքրությանն ու բարեկարգ կպահեն այն:  Ֆուտբոլասեր պատանիներն էլ իրենց հերթին խոստացել են շատ մարզվել եւ ապագայում  նպաստել հայկական գոլառատ ֆուտբոլի զարգացմանը: Այս մասին հայտնում է Երևանի քաղաքապետարանը: