Այսօր բնապահպանության նախարար Արամ Հարությունյանը հանդիպել է Իրանի Իսլամական Հանրապետության փոխնախագահ, բնապահպանության նախարար Մոհամադի Զադեհինին: Վերջինս Հայաստանում է Իրանի նախագահի` ՀՀ կատարած պաշտոնական այցի շրջանականերում:

Հանդիպման ընթացքում նախարար պարոն Հարությունյանը ներկայացրել է ՀՀ բնապահպանության ոլորտը` առանձնացնելով հատկապես բնապահպանական  խնդիրներն ու համագործակցության  հեռանկարները հայ-իրանական հարաբերությունների համատեքստում:  

Մոհամադի Զադեհինն իր հերթին ներկայացրել է Իրանի Իսլամական Հանրապետության հետաքրքրվածությունը համատեղ ծրագրերի իրականացման, տարածաշրջանային բնապահպանական խնդիրներում միասնական առաջարկություններով միջազգային կազմակերպություններում ներկայանալու,  ինչպես նաև այսօր կնքված հայ-իրանական համաձայնագրի գործողությունները կոնկրետ ժամկետներում կյանքի կոչելու իր մոտեցումները:

ՀՀ բնապահպանության նախարարը առաջարկել է կոնկրետ ծրագրային տեսքի բերել Արաքս գետի ջրի համատեղ մոնիթորինգի, մաքրման կայանների կառուցման, անդրսահմանային համատեղ ազգային պարկ ստեղծելու, այլընտրանքային էներգիայի աղբյուրների որոնման և նախագծերի իրականացման գաղափարները:

Մոհամադի Զադեհինը հրավիրել է նախարար Հարությունյանին  առաջիկայում պաշտոնական այց կատարել Իրանի Իսլամական Հանրապետություն` համատեղ  կատարված աշխատաքնքների ամփոփման և հետագա համագործակցության ընդլայնման նպատակով: Այս մասին հայտնում է բնապահպանության նախարարության մամուլի ծառայությունը: