Դատական գործի քննությունն անցկացվում է ապակեպատ նիստերի դահլիճում, որտեղ լսելիությունը չի ապահովվում ներկաների և ԶԼՄ ներկայացուցիչների համար: Այդ պատճառով վերջիններս բոյկոտեցին այսօրվա նիստը՝ խնդրելով լուծել դահլիճի տեխնիկական խնդիրը:

 Ամբաստանյալի պաշտպան Վլադիմիր Գրիգորյանը դատավոր Վաչե Մարգարյանին դիմեց խնդրանքով, որպեսզի լուծում տա առաջացած խնդրին և ապահովի դատական գործընթացի հրապարակայնությունը: «Սա ոչ միայն հրապարակայնության վերաբերյալ սահմանադրական և դատավարական նորմերի խախտում է, այլև, իմ կարծիքով, նպատակ է հետապնդում դատական գործընթացից հանրային ուշադրությունը պաշտպանական կողմի փաստարկներից զերծ պահելու համար»,-իր խոսքում նշեց պաշտպանը՝ հավելելով, որ դատարանն ունի մեկ այլ դահլիճ, որտեղ կարելի է անցկացնել նիստը: 

Դատավորը հայտարարեց 10 րոպե ընդմիջում՝ տեխնիկական խնդիրները լուծելու նպատակով, սակայն, այնուամենայնիվ, իրավիճակը մնաց անփոփոխ, և ներկա գտնվող լրագրողները լքեցին նիստերի դահլիճը:

Նշենք, որ այս խնդիրն առկա էր նաև նախորդ նիստերին. լրագրողներն այդ մասին բազմաթիվ հրապարակումներ են արել, սակայն խնդիրը չի լուծվել:   

Հիշեցնենք, որ Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանին մեղադրանք է առաջադրվել ՀՀ Քրեական օրենսգրքի 311-րդ հոդվածի 4-րդ մասի 3-րդ կետով՝ դատավորի կողմից կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ Քրեական օրենսգրքի 313-րդ հոդվածի 1-ին մասով՝ կաշառքի միջնորդությունը:   

Ազնիվ Սիրադեղյան