Արագածոտնի մարզպետ Սարգիս Սահակյանը մարզի բոլոր դպրոցներին կրկեսի տոմսեր է բաժանել և տնօրեններին հրահանգել դրանք վաճառել' մեկ տոմսը 1500 դրամ: Դասարաններ են եղել, որ ստիպված մի քանի տոմս են վերցրել և տվել գումարը:

Կատարվածի մասին Աշտարակ քաղաքի դպրոցներից մեկի տնօրենը տեղեկացրել է ԱԺ «Ժառանգություն» խմբակցության պատգամավոր Անահիտ Բախշյանին: Վերջինս էլ դիմել է ԿԳՆ աշխատակազմի ղեկավար Մհեր Ղազարյանին, ով զանգահարել է Արագածոտնի մարզպետարան և ասել, որ դպրոցներում դադարեցնեն տոմսավաճառությունը:

«Հրապարակի» տեղեկություններով' տոմսավաճառությունը դադարեցվել է միայն վերը նշված դպրոցոււմ, իսկ մյուս դպրոցներում տոմսերն ակտիվորեն վաճառվել են: