Այսօր ողջ օրվա ընթացքում ադրբեջանական բանակի առաջապահ ուժերը, հիմնականում դիպուկահարներ, ինտենսիվ կերպով շարունակել են գնդակոծել ՊԲ դիրքերը, որի հետևանքով զոհվել է երկու զինծառայող, մեկը' վիրավորվել (բոլոր զինծառայողները զորակոչվել են ԼՂՀ Մարտունու շրջզինկոմիսարիատից):

Հիշեցնենք, որ երեկ ղարաբաղաադրբեջանական հակամարտ զորքերի շփման գծում թշնամու արձակած գնդակից զոհվել էր ՊԲ ժամկետային զինծառայող Վազգեն Բախշյանը:

ԼՂՀ ՊԲ-ն հայտնում է, որ ողջ անձնակազմը խորապես ցավակցում է զոհված զինծառայողների հարազատներին:

«Վերջին շրջանում Ադրբեջանի զինված ուժերի կողմից շփման գծի ողջ երկարությամբ ծավալված նախահարձակ գործողությունները, որոնք հիմնականում իրականացվում են դիպուկահար զինատեսակներից, մեկ անգամ ևս փաստում են այն իրողությունը, որ պաշտոնական Բաքուն ոչ միայն չի կատարում միջազգային տարբեր մակարդակներում տեղի ունեցած բանակցություններում ձեռք բերված հրադադարի ռեժիմի պահպանման պահանջները, այլև առավել լկտի ու սանձարձակ բնույթ է հաղորդել իր ագրեսիվ ձեռնարկումներին»,- հայտնում է ԼՂՀ ՊԲ լրատվության և քարոզչության բաժինը: