Այսօր տեղական ինքնակառավարման մարմինների ընտրություններ են Հայաստանի Արագածոտն, Արմավիր, Արարատ, Սյունիք, Տավուշ մարզերի 317 համայնքներում:

Համայնքների 75%-ում ընտրելու են համայնքի ղեկավարի: Կենտրոնական ընտրական հանձնաժողովի տեղեկությամբ` համայնքներից 22-ում տեղի են ունենալու միայն համայնքի ղեկավարի ընտրություններ, 80 համայնքում` միայն ավագանու անդամի ընտրություններ, իսկ 215 համայնքում միաժամանակ անցկացվելու են համայնքի ղեկավարի և ավագանու անդամի ընտրություններ: Ընտրություններին կմասնակցեն համայնքի ղեկավարի 408 և ավագանու անդամի 2693 թեկնածուներ:

Հայաստանի Հանրապետական, «Բարգավաճ Հայաստան», «Հայ Յեղափոխական Դաշնակցություն» և «Օրինաց երկիր» կուսակցությունների կողմից նշանակումներ են կատարվել բոլոր 541 տեղամասային ընտրական հանձնաժողովներում: «Հայ ազգային կոնգրես» կուսակցությունների դաշինքի կողմից նշանակումներ չեն կատարվել 36 ՏԸՀ-ներում, իսկ «Ժառանգություն» կուսակցության կողմից` մեկ տեղամասային ընտրական հանձնաժողովում: 

Դիտորդական առաքելություն են իրականացնում 1 միջազգային (Եվրոպայի խորհրդի տեղական և տարածքային իշխանությունների կոնգրես) և 10 տեղական կազմակերպություններ («Ընտրական համակարգեր կենտրոն», «Կայլաս» ժողովրդավարության աջակցության ՀԿ, «Լեգալ Պրոգրես իրավական ակումբ», «Միավորում» սոցիալական շարժում, «Հանրային դիվանագիտություն», «Հայք» երիտասարդական ազգային պահպանողականների միավորում, «Թրանսփերենսի ինթերնեյշնլ հակակոռուպցիոն կենտրոն», «Ժողովրդավարություն և ընտրական գործընթացներ» միջազգային կենտրոն, «Շահեն» ՀԿ, «Իրավունքի Եվրոպա միավորում»):

«Հետք»-ի թղթակիցները տեղեկություններ կհաղորդեն տարբեր մարզերի մի շարք համայնքներից: Ընտրական օրենսգրքի խախտումներ նկատելու դեպքում կարող եք զանգահարել 010 563 363 և 010 580 219 հեռախոսահամարներին, ինչպես նաև գրել, լուսանկարներ և տեսանյութեր ուղարկել [email protected] էլեկտրոնային հասցեին: Սոցիալական ցանցերում ընտրությունների վերաբերյալ տեղեկություններ հրապարակելիս կօգտագործվի #armlocalvote հեշթեգը:

լուսանկարը` Անահիտ Հայրապետյանի