Արմինե Ուդումյան

Մեր հավաստի տեղեկությունների համաձայն, առաջիկա խորհրդարանական ընտրությունների ժամանակ մի շարք կուսակցություններ, որոնք ազնիվ մրցապայքարում հաղթելու (այսինքն 5 տոկոսի արգելքը հաղթահարելու) ոչ մի շանս չունեն, աշխատում են «ավանդական եղանակով» ընտրվելու ուղղությամբ: Ցավոք, չենք կարող նշել հրապարակվող տեղեկությունները հայտնած իրավասու անձանց (աղբյուրների) ոչ անունները, ոչ էլ պաշտոնները, նրանց չվտանգելու համար:

Հիշյալ կուսակցությունները մտադիր են համապատասխան չափով ձայներ հավաքել ընտրակաշառքի միջոցով: Գրեթե բոլորին հայտնի այս տեղեկությունը «Hetq»-ին փոխանցելուց հետո նույն աղբյուրն ավելացրեց, որ վերջիններս «գործին» մոտենում են ամենայն լրջությամբ, կատարում են ստույգ հաշվարկներ: Այսպիսով, զրոյականին ձգտող վարկանիշով կուսակցություններց մեկը անհրաժեշտ ձայների քանակը հաշվարկել է հետեւյալ կերպ. ընտրություններին միջինը մասնակցում է 1 միլիոն 200 հազար մարդ: Սրա 5 տոկոսը կազմում է 60 հազարը: Որպես կանոն, միջինը 50 հազար ձայն անվավեր է ճանաչվում: Բայց ապահովության համար կուսակցությունը սա չի հանում «գնելիք» ձայների քանակից:

Հայտնի են նաեւ ընտրակաշառքի «սակագները». միջինը 5000 դրամ մեծամասնականի համար, համամասնականի համար՝ ավելի քիչ, որովհետեւ «մրցակցությունն» անահամեմատ փոքր է (այսինքն համամասնականի համար գումար առաջարկողները քիչ են): Սակայն կուսակցությունը հաշվել է. եթե նույնիսկ 5000 դրամով գնվեն ձայները, էլի ձեռնտու է: Քանի որ այս գործը բռնածներից խելացիներն ավելորդ փողեր չեն ծախսում նախընտրական հանդիպումների, մարզերում այցելությունների վրա, ուստի մի 500 հազար դոլար հաստատ կճարվի խորհրդարան մտնելու համար: Իսկ եթե հաշվի առնենք նաեւ այն, որ ոչ բwլոր ձայներն են, որ կանխիկ փողով են «գնվելու», ապա կուսակցությունն էժան կպրծնի:

Նմանատիպ մեկ այլ կուսակցություն նույնքան մանրակրկիտ չի «ուսումնասիրել» ձայների գնման տեխնոլոգիան, որպես ընտրազանգված ընտրելով էլեկտրաէներգիայի դիմաց խոշոր պարտք ունեցող ընտանիքներին, ինչի պատճառով յուրաքանչյուր մեկ ձայնն ավելի թանկ է նստել անփորձ այդ կուսակցության վրա: Կուսակցությունը մարել է 30 հազար դրամից ավելի պարտքերը: Իսկ մեկ ընտանիքը միջինը 2-4 ընտրող ունի: Հանրապետության գյուղերից մեկում ձայների աճուրդ է. մեծամասնական կարգով առաջադրված թեկնածուներից մեկը խոստացել է առնվազն 2-3 հազար դրամով ավելի վճարել յուրաքանչյուր ձայնի համար, քան իր հիմնական մրցակիցը: