Հայաստանի գործարար միջավայրի ցուցանիշը (ԳՄՑ) 2015թ. չորրորդ եռամսյակում նախորդ եռամսյակի համեմատ ավելացել է 0,2 կետով և կազմել է 50,5։ Այդպիսով, ԳՄՑ-ն շարունակում է գտնվել կայունության միջակայքում: Այս մասին տեղեկանում ենք ՀՀ կենտրոնական բանկի (ՀՀ ԿԲ) հրապարակած ցուցանիշներից։

Հիշեցնենք, որ ԿԲ-ն գործարար միջավայրի արժեքը հաշվարկում է արդյունաբերությունում՝ թողարկման ընթացիկ և սպասվող ծավալների ու պաշարների վերաբերյալ կազմակերպությունների սպասումների, շինարարությունում՝ ընկերության ներկա տնտեսական վիճակի և աշխատողների ընթացիկ թվաքանակի, առևտրում՝ թողարկման ընթացիկ և սպասվող ծավալների և արտադրանքի նկատմամբ պահանջարկի, ծառայություններում՝ ընկերության ներկա ու սպասվող տնտեսական վիճակի փոփոխությանը վերաբերվող հարցերի պատասխանների սեզոնային հարթեցված մակարդակների հիման վրա:

Արդյունաբերության և շինարարության ոլորտում գործարարների սպասումները  մեծ չեն։ Այս երկու ոլորտներում բացասական միտում է արձանագրվել։ Միևնույն ժամանակ, առևտրի և ծառայությունների ոլորտների ցուցանիշները բարելավվել են, ինչն էլ ապահովել է ԳՄՑ-ի աճը։ Ընդ որում, ամենամեծ սպասումները ծառայությունների ոլորտից են, իսկ ամենաքիչը՝ շինարարության։

Ինչպես երևում է, գործարար միջավայրի ցուցանիշը նախորդ տարվա վերջին եռամսյակում աճել է նաև  2014  թվականի նույն ժամանակաշրջանի համեմատ՝ 1,3  տոկոսային կետով։  Այդ աճն ապահովվել է բացառապես ծառայությունների ոլորտի սպասումների ֆոնին։ Իսկ արդյունաբերության, շինարարության և առևտրի ոլորտից մեկ տարի առաջ սպասումներն ավելի շատ են եղել, քան 2015-ի վերջին եռամսյակում։

ԳՄՑ-ի հաշվարկման համար տրվող հարցերը ունեն պատասխանների հետևյալ տարբերակները. աճ, անփոփոխ մակարդակ, նվազում: Պատասխանների հիման վրա հաշվարկվում է յուրաքանչյուր տարբերակի տեսակարար կշիռը պատասխանների ընդհանուր քանակում, այնուհետև դրական պատասխանների տեսակարար կշռին գումարվում է չեզոք պատասխանների կշռի կեսը` ստանալով պատասխանների արժեքները: Արժեքները տատանվում են [0, 100] միջակայքում: 0 արժեքը խոսում է այն մասին, որ բոլոր ռեսպոնդենտները նշել են նվազում, 100 արժեքը` աճ, իսկ 50 արժեքը` կայուն վիճակ (աճ և նվազում ակնկալող հարցվողների քանակը հավասար է):

Որպես կայունության միջակայք ընդունվել է արժեքի տատանումը 45-ից մինչև 55-ը: