Միսաք Գաբրիելյան

Թեպետ նախընտրական քարոզարշավը պաշտոնապես չի մեկնարկել, թիվ 19 ընտրատարածքում (Էջմիածին) մեծամասնական ընտրակարգով առաջադրված պատգամավորության թեկնածուներից մեկ-երկուսի մարդիկ արդեն այցելում են մարդկանց տները:

Ընտրազանգվածին կողմնորոշելու ակտիվ աշխատանքներ է ծավալում մասնավորապես գեներալ Սեյրան Սարոյանը, ում թիմակիցներին ավելի հաճախ կարելի է հանդիպել քաղաքի տարբեր թաղամասերում:

Իսկ Հակոբ Հակոբյանի ( Ճոյտ ) շրջապատը, որ նախորդ ընտրություններից շատ ավելի վաղ ու շատ ավելի աղմկոտ կերպով էր իր մասին հիշեցնել տալիս ( օգնություններ էր բաժանում, կրթական եւ բուժհիմնարկություններ այցելություններն ուղեկցվում էին նվերներով ), հիմա կարծես վերամշակել է գործողությունների մարտավարությունը:

Նախ` ուժերն ամբողջությամբ կենտրոնացրել է Զվարթնոցում, որը, էջմիածնեցիների բնորոշմամբ, նրա անառիկ ամրոցն է, իսկ նախընտրական շտաբը, որ սովորաբար տեղակայվում էր քաղաքի կենտրոնի աչքի ընկնող շենքերց մեկում, նույնպես փոխել է աշխարհագրությունը. շտաբ է դարձել Զվարթնոցի նրա օբյեկտներից մեկը: Այս առիթով Էջմիածնում ասում են, թե «զինվորական դիկտատուրան» Հակոբյանին արգելել է տեղակայվել ու գործողություններ ծավալել քաղաքի կենտրոնում, քանի որ այդ տարածքի մենաշնորհն այլեւս նոր տիրոջը` Ս. Սարոյանին է պատկանում: Իսկ վերջինս, որ նախընտրական քարոզարշավում առայժմ աչքի է ընկնում ոչ գրագետ մարտավարությամբ, իր հաջողությունը հիմնականում կապում է ոչ թե ընտրողների, այլ իրեն սատարող ՀՀԿ-ի հետ: Այսպես` թեպետ պաշտոնաթող գեներալն «ամեն ինչ անում է ընտրողներին սիրաշահելու համար»` նրանց աչքում հանդես գալով որպես բարեհոգի ու ժողովրդի հոգսով ապրող մարդ, այդուհանդերձ քայլեր է անում, որոնք հակառակ ազդեցությունն են գործում ընտրազանգվածի վրա: Հիշենք թեկուզ վերջերս ուսուցիչների համար կազմակերպած նրա կերուխումը, որն ավարտվել էր գեներալ-թեկնածուի կրակոցներով ու վախեցած մանկավարժների խուճապահար փախուստով:

Հիմա Սեյրան Սարոյանն այդ խրախճանքների համար ժամանակացույց է կազմել, ըստ որի ռեստորան են գնալու ոչ թե դպրոցների տնօրենների հայեցողությամբ ընտրված ուսուցիչները, այլ բոլորը, բայց յուրաքանչյուր դպրոց` համաձայն նախապես կազմված գրաֆիկի: Բուժհիմնարկներին էլ է ռեստորան «գործուղել» փոքր-ինչ լիցքաթափվելու: Բուժաշխատողները, սակայն, ի տարբերություն ուսուցիչների, հրաժարվել են իրենց «հանգիստն» այդ ձեւով անցկացնելու եղանակից, բայց փոխարենը համաձայնվել են դրա համար նախատեսված գումարը վերցնել. յուրաքանչյուրին բաժին է հասել 2200 դրամ: «... Ու այդ քնձռոտ կոպեկները ստացանք մեր անվան դիմաց ստորագրելուց հետո: Ամոթ էր, բայց վերցրեցի, որովհետեւ կմտածեին, թե ձայնս իրեն չեմ տալու: Բացի այդ, ռուսն ասում է` տալիս են` վերցրու»,- անձը չբացահայտելու պայմանով ասաց մի բժշկուհի:

Էջմիածնի նախընտրական տրամադրությունները լավ շոշափել էր նաեւ մեզ ուղեկցող տաքսու վարորդը, ում փոխանցմամբ` հանրապետականացված դպրոցներին ու բուժհաստատություններին արդեն ցուցում է տրվել, թե ում օգտին են քվեարկելու:

«Եթե ընտրություններն իրոք արդար ընթանան, Հակոբյանը կընտրվի, բայց ոչ թե նրա համար, որ նա միակն ու անփոխարինելին է, այլ որովհետեւ մենք ընտրություն ենք անելու վատի եւ վատթարագույնի միջեւ: Հենց դրանից եմ վիրավորվում. մեր քաղաքում միշտ է այդպես եղել: Բա էս քաղաքում մի գրագետ, կրթված մարդ չկա՞, որ ուզենա պատգամավոր դառնալ, մենք էլ սրտանց գնանք ընտրենք»: Ըստ մեր զրուցակցի` Սարոյանի ընտրազանգվածը հիմնականում գյուղերում է: Նրա համար դժվար կլինի իր անձի վրա սեւեռել հատկապես ընտրողների այն հատվածի ուշադրությունը, ովքեր մայրաքաղաքում սովորող ուսանողներ ունեն. նրանց ծնողների ուշադրությունը Հակոբյանը գնել է դեռ մի քանի տարի առաջ սովորողների ճանապարհածախսը ստանձնելու գնով: Սարոյանն անելիք չունի նաեւ Զվարթնոցում, որի բնակիչները Հակոբյանից բացի այլընտրանք չունեն:

Նկատենք, որ դեռեւս չմեկնարկած քարոզչության գործում ներքաշվել են մեծ թվով ուսուցիչներ, դպրոցների տնօրեններ, որոնց վրա էլ հենց թեկնածուներն իրենց խաղադրույքներն են անում: