Այսօր` մայիսի 12-ին, Գյումրու քաղաքապետ Սամվել Բալասանյանն ընդունել է 2015 թ.-ի ապրիլին Եվրոպայի առաջնություններում մեդալներ նվաճած գյումրեցի մարզիկներին և նրանց մարզիչներին: Այս մասին հայտնում են Գյումրու քաղաքապետարանից:

Հանդիպման սկզբում քաղաքապետը շնորհավորել է մարզիկներին` հաջողություններ մաղթելով առաջիկա մրցաշարերում: Սամվել Բալասանյանը բարձր է գնահատել մարզիկների և մարզիչների աշխատանքը` հույս հայտնելով, որ հաղթանակները կլինեն շարունակական, հատկապես, որ Գյումրու սպորտը մշտապես առաջատար դիրքերում է:

Մարզիկներն ու մարզիչներն իրենց հերթին շնորհակալությունն են հայտնել ուշադրության համար՝ խոստանալով հաջորդ մրցաշարերից եւս վերադառնալ մեդալներով: Հանդիպման վերջում քաղաքապետ Սամվել Բալասանյանը դրամական պարգևներ է հանձնել մարզիկներին և մարզիչներին` խոստանալով մշտապես ուշադրության կենտրոնում պահել սպորտը: